कोरेगाव पार्क परिसरातील तेजवानीच्या घराची झडती

पिंपरी, ता. १९ : मुंढवा येथील जमीन खरेदी-विक्री गैरव्यवहार प्रकरणातील आरोपी शीतल तेजवानी हिच्या कोरेगाव पार्क परिसरातील घराची बावधन पोलिसांनी शुक्रवारी (ता. १९) झडती घेतली. पिंपरीतील तिच्या कार्यालयातही पोलिस गेले होते. मात्र, कार्यालय बँकेने सील केले आहे.
या प्रकरणात पुणे शहर पोलिसांच्या आर्थिक गुन्हे तेजवानीला अटक केली होती. पोलिस कोठडीची मुदत संपल्यानंतर न्यायालयाने तिची रवानगी येरवडा कारागृहात केली होती. बावधन पोलिसांनी मंगळवारी (ता. १६) न्यायालयाचे ‘प्रोड्यूस वॉरंट’ घेऊन येरवडा कारागृहातून तिला अटक केली. सध्या ती बावधन पोलिसांच्या कोठडीत आहे. ती कोरेगाव पार्कमध्ये भाड्याच्या घरात राहते. पोलिसांनी तेथून काही कागदपत्रे जप्त केली.
---
तारू न्यायालयीन कोठडीत
दस्त नोंदणी करणारा सह दुय्यम निबंधक रवींद्र बाळकृष्ण तारू (रा. भोर) याला बावधन पोलिसांनी सात डिसेंबरला अटक केली होती. न्यायालयाने त्याला शुक्रवारपर्यंत (ता. १९) पोलिस कोठडी दिली होती. ती मुदत संपल्याने पोलिसांनी शुक्रवारी त्याला न्यायालयात हजर केले. त्याला न्यायालयीन कोठडीत ठेवण्याचे आदेश देण्यात आले. त्यानुसार त्याची येरवडा कारागृहात रवानगी करण्यात आली.
----------------------