श्री खंडोबा देवाचा वार्षिक उत्सव आकुर्डीत २६-२७ डिसेंबरला

पिंपरी, ता. २३ ः आकुर्डी गावचे ग्रामदैवत श्री खंडोबा देवाचा वार्षिक उत्सव २६ ते २७ डिसेंबर या कालावधीत पारंपरिक श्रद्धा, भक्ती आणि उत्साहाच्या वातावरणात साजरा होणार आहे. या उत्सवानिमित्त कुस्त्यांचा जंगी आखाडा, फायर शोसह विविध धार्मिक व सांस्कृतिक कार्यक्रमांचे आयोजन करण्यात आले असून, गावासह पंचक्रोशीतील सर्व भाविकांनी व नागरिकांनी मोठ्या संख्येने उपस्थित राहून, दर्शनाचा व उत्सवाचा लाभ घ्यावा, असे आवाहन उत्सव समितीच्या वतीने करण्यात आले आहे.
उत्सवाच्या पहिल्या दिवशी शुक्रवारी (ता. २६) पहाटे ५.३० वाजता मंगलस्नान व महाअभिषेक सोहळ्याने उत्सवाची सुरुवात होणार आहे. यानंतर दिवसभर श्रींचे दर्शनासाठी मंदिर खुले असणार आहे. सायंकाळी ७ वाजता श्रींची महाआरती होणार असून, रात्री ९ वाजता पालखीचा भव्य ग्रामप्रदक्षिणा सोहळा पार पडणार आहे. या पालखी सोहळ्यात संपूर्ण आकुर्डी गाव भक्तिरसात न्हाऊन निघणार आहे. दुसऱ्या दिवशी शनिवार (ता. २७) सकाळी ९ वाजता खंडोबा सांस्कृतिक भवन, आकुर्डी येथे उत्सवाचा मुख्य सांस्कृतिक कार्यक्रम होणार आहे. या दिवशी होणाऱ्या पालखी सोहळ्यात श्री खंडोबा व श्री म्हाळसा देवी घोड्यावर स्वार अशा रूपात दर्शन देणार असून, भाविकांसाठी हे विशेष आकर्षण ठरणार आहे.
पालखी सोहळ्यात सहभागी होणाऱ्या प्रमुख आकर्षणांमध्ये शंभुराजा ढोल-ताशा पथक, पारंपरिक वाजंत्री व गोंधळी मंडळ, प्रभात बँड तसेच हलगी वादक पथक यांचा समावेश आहे. उत्सवाच्या पार्श्वभूमीवर गावात विद्युत रोशणाई, फुलांची सजावट व स्वागत फलक लावण्यात आले असून, मंदिर परिसर व ग्रामप्रदक्षिणा मार्ग सजविण्यात आला आहे.
---