विविध उपक्रमांद्वारे अमली पदार्थ विरोधी जनजागृती

पिंपरी, ता. २८ ः जागतिक अमली पदार्थविरोधी दिनानिमित्त पिंपरी-चिंचवड पोलिस आयुक्तालयांतर्गत येणाऱ्या महाविद्यालयात जनजागृतीपर विविध उपक्रम घेण्यात आले. अमली पदार्थामुळे शरीरावर होणारे दुष्परिणाम, मनावर होणारा आघात आणि कुटुंबियाना भोगावा लागणारा त्रास यावर विविध तज्ज्ञांनी मार्गदर्शन केले.

नालसा डॉन उपक्रमांतर्गत आकुर्डी प्राधिकरणातील डॉ. हेडगेवार मैदान, मासुळकर कॉलनी, पिंपरी येथे जनजागृती कार्यक्रम घेण्यात आले. या कार्यक्रमात सुमारे ३०० नागरिक सहभागी झाले होते. औंध रुग्णालयाचे जिल्हा सल्लागार डॉ. जयश्री सारस्वत यांनी व्यसनांचे दुष्परिणाम व व्यसनमुक्तीसाठी शासनाच्या विविध योजनांची माहिती संगितली. स्माइल व्यसनमुक्ती केंद्राचे संचालक हर्षल पंडित यांनी वाढती व्यसनाधीनता व त्याचे युवकांवर होत असलेले दुष्परिणाम तसेच उपचार याबाबत मार्गदर्शन केले. विमल फाउंडेशनचे व्यवस्थापक विल्यम साळवी यांनी व्यसनांचे आरोग्यावर होणारे परिणाम व त्यांचे पुनर्वसन यावर माहिती सांगितली. वरिष्ठ पोलिस निरीक्षक संतोष पाटील, सहाय्यक पोलिस निरीक्षक सचिन कदम यांनी अमली पदार्थ विरोधी कायद्याची माहिती समजावून सांगितली.
डिवाईन फाउंडेशन यांचे माझी वसुंधरा अभियान ०२ हे पथनाट्य सादर करण्यात आले. नेहरुनगर, पिंपरी परिसरातील मासुळकर कॉलनी येथे एचए मैदान, झिरो बॉइज चौक, फुलेनगर झोपडपट्टी, अमली पदार्थ विरोधी पथक, गुन्हे शाखा, पिंपरी-चिंचवड कार्यालय अशी पायी रॅली काढण्यात आली. फुलेनगर पिंपरी झोपडपट्टी येथे पथनाट्याद्वारे अमली पदार्थाचे दुष्परिणाम यावर माहिती देण्यात आली. यासह पोलिस आयुक्तालयांतर्गत येणाऱ्या महाविद्यालयात तसेच शाळांमध्ये व्यसनाधीनतेचे दुष्परिणाम यावर जनजागृती करण्यात आली.
---