गुन्हे वृत्त

ज्येष्ठ महिलेची सोनसाखळी हिसकावली
पिंपरी : गर्दीचा फायदा घेत एका महिलेने एका ज्येष्ठ महिलेच्या गळ्यातील सुमारे पन्नास हजार रुपये किंमतीची सोनसाखळी हिसकावली. ही घटना भोसरीतील पीएमटी बसथांब्यावर घडली.
याप्रकरणी महिला आरोपी (रा. विश्रांतवाडी, पुणे, मूळ - गुलबर्गा) हिला अटक करण्यात आली आहे. तानाजी चिंतामणी पारधी (रा. साईपार्क, यमाईनगर, पुणे, मूळ - हातवीस, ता. जुन्नर, पुणे) यांनी भोसरी पोलिस ठाण्यात फिर्याद दिली. पीडित महिला आणि फिर्यादी हे भोसरी येथील पीएमटी बस थांब्यावर उभे असताना आरोपी महिला गर्दीचा फायदा घेत फिर्यादी यांच्या आईच्या गळ्यातील ५० हजार रुपये किंमतीची सोनसाखळी हिसकावून तिथून पसार झाली.

वाहन तळातील चार दुचाकी पेटविल्‍या
पिंपरी : इमारतीच्या वाहनतळात उभ्या चार दुचाकींना आग लावून त्या पेटविण्यात आल्या. ही घटना थेरगाव येथील कन्हैय्या पार्क येथे घडली. या प्रकरणी गौतम मनोज गायकवाड (वय ३०, रा. कन्हैय्या पार्क, थेरगाव) यांनी वाकड पोलिस ठाण्यात फिर्याद दिली आहे. त्यानुसार अज्ञात आरोपीवर गुन्हा दाखल झाला आहे. फिर्यादी यांच्यासह त्यांचे शेजारी अवधूत ढगे, विश्वंभर धनलोभे, रामू नावंदे यांच्या दुचाकीही अज्ञात व्यक्तीने जाळल्या. त्यात अंदाजे ७० हजार रुपयांचे नुकसान झाले आहे.