‘खेळाडू दत्तक योजना’च ‘बेवारस’

पिंपरी, ता. १० ः महापालिकेच्या क्रीडा विभागाने ‘खेळाडू दत्तक योजना’ कोरोनाची कारणे देत बासनात गुंडाळली आहे. मागील तीन-चार वर्षापासून जाहिरात देऊनही केवळ खेळाडूंकडून अर्ज मागविण्यात येत आहेत. प्रत्यक्षात एकाही खेळाडूला त्याचा लाभ मिळाला नसल्याची माहिती पुढे आली आहे. परिणामी, क्रीडा विभागाकडून दफ्तर दिरंगाई केली जात असल्याची वस्तुस्थिती आहे.
खेळाडूंना आर्थिक, सामाजिक आणि क्रीडाविषयक सुविधा पुरवून त्यांना प्रोत्साहन देण्यासाठी पिंपरी-चिंचवड महापालिका क्रीडा विभागाकडून ‘खेळाडू दत्तक योजना’ १४ जून २०१२ पासून सुरू केली होती. या योजनेतून प्रतिदिन भत्ता, आहार, किट्सह क्रीडा साहित्य खरेदीसाठी भत्ता मंजूर केला होता. यासाठी अंदाज पत्रकातून पाच टक्के रक्कम खर्च करणे बंधनकारक केले आहे.

शिष्यवृत्ती घ्या, खेळाडू दत्तक योजना नाही
पूर्वीपासून ‘शिष्यवृत्ती व खेळाडू दत्तक योजना’ या दोन्हीही दिल्या जात होत्या. शिष्यवृत्ती योजना वर्षातून एकदाच दिली जाते, ती अत्यंत तोकडी आहे. राज्य व राष्ट्रीय खेळाडूंनाच वर्षातून एकदा अनुक्रमे तीन हजार ते साडेसहा हजार रुपये दिले जातात. खेळाडू दत्तक योजनेतील खेळाडूस प्रतिदिनी दोनशे रुपयेप्रमाणे महिना सहा हजार रुपये आहार भत्ता किट्स क्रीडा साहित्यिकांसाठी दिले जातात. आता फक्त शिष्यवृत्ती देऊन क्रीडा विभागातील कर्मचारी खेळाडूंना आर्थिक मदत केल्याचा टेंबा मिरवून खेळाडू दत्तक योजना गुंडाळत आहेत. ‘शिष्यवृत्ती घ्या, खेळाडू दत्तक योजना नाही,’ असा नवा नवीन बनाव केला आहे.

पालकांची दिशाभूल
पालकांनी ‘सारथी हेल्प लाईन’कडे तक्रार केली असता क्रीडा विभागातील कर्मचारी दीपक कन्हेरे सुद्धा खेळाडूंची तसेच पालकांची दिशाभूल करत आहेत. आयुक्त साहेबांकडे फाइल आहे. त्यांची सही झाली की योजना सुरू होईल, अशी बतावणी करत आहेत. आयुक्त उत्तम प्रशासक म्हणून कार्यभार सांभाळत आहेत. खेळाडू दत्तक योजनेसाठीच का मंजुरी मिळत नाही. याच योजनेकडे दुर्लक्ष का होत आहे.

कोरोनाची कारणे देत योजना गुंडाळली?
कोरोनाची कारणे देत ही योजना बंद केली होती. दुसरीकडे महापालिकेचे आर्थिक कारभार चालले आहेत. मग खेळाडूंच्या दत्तक योजनेसाठी असे कारण काय? प्रशासक आयुक्त शहरातील रस्ते, वीज, पाणी, निचरा स्वच्छता, उद्याने, मैदान कामे मागील तीन चार वर्षांपासून अत्यंत उत्तम पद्धतीने करीत आहेत, मग खेळाडू दत्तक योजना सुरू करण्यासाठीच पालिकेतील क्रीडा विभागातील अधिकारी, कर्मचारी विविध कारणान्वे टाळाटाळ करीत आहेत.

खेळाडू तसेच पालकवर्ग यांनी अनेकदा चौकशी केली. मात्र, पालिका कर्मचारी तसेच अधिकारी समाधान कारक उत्तरे देत नाहीत, काहीही मनमानी उत्तरे देतात. याला आयुक्त जबाबदार आहेत. शिष्यवृत्ती आणि दत्तक योजना वेगवेगळ्या असून यापैकी एकच मंजूर होईल,’’ असे लिपिक दीपक कन्हेरे पालकांना सांगत आहेत.
- विजय पाटील, पालक

खेळाडू दत्तक योजनेचा विषयाची फाइल आयुक्त शेखर सिंह यांच्याकडे सहीसाठी आहे. पण प्रत्यक्षात अजून खेळाडूंकडून अर्ज मागविण्याची जाहिरात दिलेली नाही. तर जुन्या प्रकरणाच्‍या कागदपत्रांची पडताळणी सुरू आहे. काही खेळाडूंना शिधापत्रिका अनिवार्य केली आहे.
- शीतल मारणे, क्रीडा अधिकारी महापालिका