मागण्यांसाठी बांधकाम कामगार लढा उभारणार

पिंपरी, ता. २१ ः महाराष्ट्रातील बांधकाम कामगारांचे अनेक प्रश्न आहेत, बांधकाम कामगारांचे विमा संरक्षण वाढ, कालबद्ध अर्ज निकाली काढणे, बांधकाम कामगारांना ईएसआयसी योजना लागू करणे, कामगारांची पिळवणूक थांबवणे अशा मुद्यांवर राज्यव्यापी लढा उभारण्याचा निर्णय कामगार संघटनांनी आकुर्डी येथे आयोजित राज्यव्यापी बैठकीत रविवारी (ता. २०) घेतला.
महाराष्ट्र राज्य बांधकाम कामगार संघटना स्वतंत्र कृती समिती आणि कष्टकरी संघर्ष महासंघ महाराष्ट्र यांच्या वतीने आकुर्डी येथील श्रमशक्ती भवन येथे बैठक झाली. यावेळी अध्यक्षस्थानी सागर तायडे, स्वागताध्यक्ष काशिनाथ नखाते, कार्याध्यक्ष राजकुमार होळीकर, धाराशिवचे आनंद भालेराव, यवतमाळचे रत्नपाल डोफे, वर्ध्याचे मनीष गोरखेडे, मुंबईच्या विनिता बाळेकुंद्री, पुणे येथून शैलजा आरळकर, नाशिकचे सुनील लाखे, संभाजीनगरचे कमलेश दाभाडे, हिंगोलीचे नितीन दवंडे, अकोलाचे प्रशांत मेश्राम, कोल्हापूरचे राजेंद्र सुतार, साताऱ्याचे सागर कुंभार, लातूरचे अजय कांबळे, सोलापूरचे ज्ञानेश्वर देशमुख, भंडाऱ्याचे मंगेश माटे, परभणीचे अशोक वाघमारे, सांगलीचे अनिल लोहार आदी उपस्थित होते.

बैठकीतील मागण्या
- बांधकाम कामगारांना ईएसआयसी योजना लागू करणे
- बांधकाम कामगारांचे लाभांचे अर्ज एक महिन्यात निकाली काढणे
- शासनाने ई-प्रशासन धोरण त्वरित लागू करावे
- बांधकाम कामगार कल्याणकारी मंडळातील खासगीकरण रद्द करावे
- महामंडळ लागू करण्याबाबत संघटनेला विश्वासात घेऊन निर्णय घ्यावा
- मागण्या मान्य न केल्यास न्यायालयीन लढा देणे
---