साबुदाण्याचे भाव स्थिर; भगर महाग

पिंपरी, ता. २४ ः दरवर्षी श्रावणात साबुदाणा, भगरला मोठी मागणी असते. यंदाही मागणी मोठ्या प्रमाणावर राहण्याची शक्यता आहे. बाजारात साबुदाण्याची मोठ्या प्रमाणात आवक झाली आहे. त्यामुळे यंदा सणासुदीच्या दिवसांत साबुदाण्याचे भाव स्थिर राहणार आहेत. मात्र, भगरचे भाव यंदा वाढले असल्याची माहिती साबुदाणा, भगर व्यापाऱ्यांनी दिली.
श्रावणात सोमवारी आणि शनिवारी अनेकजण उपवास करतात. उपवासासाठी भाविकांकडून साबुदाणा आणि भगरला पसंती असते. त्यामुळे श्रावणात साबुदाणा, भगर आणि शेंगदाण्याला मोठ्या प्रमाणावर मागणी असते. तमिळनाडू येथील सेलम जिल्ह्यातून संपूर्ण देशात साबुदाणा पाठविला जातो. राज्यातही तेथूनच माल येतो. सध्या घाऊक बाजारात साबुदाण्याची ४२ ते ५० रुपये प्रति किलो भावाने विक्री होत आहे. मागील काही दिवसांपासून साबुदाण्याची मागणी घटल्याने दर प्रति क्विंटल ५०० रुपयांनी घसरले आहेत. तसेच नाशिक जिल्ह्यातून दररोज भगरची आवक होत आहे. घाऊक बाजारात भगर १०५ ते १०७ रुपये प्रतिकिलो भावाने भगरची विक्री होत आहे. भगरचे भावही यंदा ७ ते १० रुपयांनी वाढले आहेत.

परराज्यातून आवक
शेंगदाण्याच्या मागणीत मोठी वाढ झाली आहे. गुजरात, आंध्र प्रदेश, कर्नाटक आणि उत्तर प्रदेश येथून त्याची आवक होत आहे. चांगल्या मालाला घाऊक बाजारात किलोला १०५ ते ११० रुपये, घुंगरूला १०० ते १०५ रुपये, शेंगदाणा १ नंबरला ११० रुपये, २ नंबरला ९५ आणि ३ नंबरला ९० रुपये प्रतिकिलोचा भाव मिळत आहे.

घाऊक बाजारातील भाव (प्रतिकिलोस)
साबुदाणा १ - ५०
साबुदाणा २ - ४५
साबुदाणा ३ - ४२
भगर १०५ ते १०७
सावा भगर ९५

किरकोळ बाजारातील भाव (प्रतिकिलोस)
साबुदाणा - ५५ ते ६०
भगर - ९५ ते ११०
शेंगदाणा - १०० ते १२०

दरवर्षी साबुदाणा, भगरला मोठी मागणी असते. यंदाही साबुदाणा, शेंगदाण्याची मोठ्या प्रमाणावर मागणी आहे. यंदा साबुदाणा, शेंगदाणा यांचे भाव स्थिर आहेत.
- सुशील बजाज, सचिव, पिंपरी किराणामाल असोसिएशन