रिंग रोड विकसित करण्याचा मार्ग मोकळा
पिंपरी, ता ३१ ः पुणे महानगर प्रदेश विकास प्राधिकरणाने (पीएमआरडीए) तयार केलेल्या प्राथम‍िक नगर रचना योजनांना (टीपी) शासनाकडून मान्यता मिळाली आहे. या निर्णयामुळे पीएमआरडीए क्षेत्रातील संबंधित गावालगतच्या विकास कामांना गती मिळणार आहे. पाच ‘टीपी’ योजना मंजूर झाल्याने सुमारे ६.८ किलोमीटर लांबीचा रिंग रोड विकसित करता येणार आहे, असा दावा पीएमआरडीए अधिकाऱ्यांनी केला आहे.
पीएमआरडीए हद्दीतील रिंगरोड संपाद‍ित होऊन नियोजनबद्ध विकास कामांना गती मिळावी, या उद्देशाने नगर रचना योजना राबविण्याचा निर्णय घेण्यात आला होता. त्या अनुषंगाने राज्य शासनाकडे मंजुरीसाठी प्रस्ताव पाठवण्यात आले होते. त्यास शासनाने नुकतीच अंतिम मान्यता दिली असून पीएमआरडीए हद्दीतील ४ ‘टीपी’ योजनांना हिरवा कंदील मिळाला आहे. त्यात वडाची वाडी, औताडे - हांडेवाडीला प्रत्येकी एकेक आणि होळकर वाडीसाठी २ अशा ४ योजनांना शासनाने अंतिम मान्यता दिली आहे. याखेरीज पुणे महानगरपालिका हद्दीतील फुरसुंगीमधील योजनेचा पण समावेश आहे.
शासनाकडून मंजुरी मिळालेल्या ‘टीपी’ योजनांबाबत तातडीने पुढील प्रक्रिया पीएमआरडीएकडून करण्यात येत आहे. यासाठी संबंधितांशी चर्चा करून रस्ता ताब्यात घेण्याच्या अनुषंगाने मार्ग मोकळा झाला आहे. नव्याने प्रस्तावित केलेल्या १५ योजनांसाठी देखील जाहीर सूचना देण्यात आली आहे. याबाबत संबंधित लोकप्रतिनिधी, नागरिक आणि शेतकऱ्यांना विश्वासात घेऊन आराखडे निश्चित करण्यात येणार आहे.
या गावांसाठी जाहीर सूचना
पीएमआरडीएअंतर्गत ६५ मीटर रुंद वळण रस्त्याचे क्षेत्र मिळण्यासाठी एकूण १५ ‘टीपी’ योजना घोषित करण्याबाबत जाहीर सूचना देण्यात आली आहे. त्यात वाघोली, आव्हाळवाडी, मांजरी खुर्द १, मांजरी खुर्द २, मांजरी खुर्द ३, वडकी (ता. हवेली), माण (मुळशी), धामणे, धामणे, गोदुंबरे, दारुंबरे/ साळुंब्रे १, दारुंबरे/ साळुंब्रे २, सांगवडे (ता. मावळ), नेरे, बावधन बु. (ता. मुळशी) या गावांतील योजनांचा समावेश आहे.
‘टीपी’ योजनांना मंजुरी मिळाल्यामुळे विकास प्रक्रियेला गती येईल. नव्याने प्रस्तावित केलेल्या १५ योजनांबाबत स्थानिक पातळीवरील लोकप्रतिनिधी, शेतकऱ्यांशी चर्चा करूनच पुढील निर्णय घेण्यात येणार आहे. विशेष म्हणजे गावनिहाय बैठका घेऊन शेतकऱ्यांची बाजू समजून घेत त्यांच्या सूचनांचा विचारात घेऊन पुढील आराखडे तयार करण्यात येतील.
- डॉ. योगेश म्हसे, महानगर आयुक्त, पीएमआरडीए
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.