शांतता, पण काम सुरू आहे म्हणून नव्हे...

पिंपरी, ता. २ : पुणे महानगर प्रदेश विकास प्राधिकरणाच्या (पीएमआरडीए) आकुर्डीतील मुख्यालयात शुक्रवारी नेहमीची लगबग नव्हती. तेथे शांतता होती...नाही, नाही, ही काम सुरू आहे म्हणून ही शांतता नव्हती, तर कर्मचारीच नसल्याने चक्क शुकशुकाट होता.
आयुक्त आणि वरिष्ठ अधिकारी बैठकीसाठी बाहेर गेले होते. ते नसल्याने कर्मचाऱ्यांनी मुख्यालयाकडे पाठ फिरविली. परिणामी विविध कामांसाठी आलेल्या नागरिकांना हताश होऊन परतावे लागले.
आयुक्‍त असल्यावर कर्मचाऱ्यांना हजर राहावे लागते. आयुक्‍त कामासाठी बाहेर गेल्‍यावर हेच कार्यालय मोकळे दिसते. शुक्रवारी मुख्यमंत्री देवेंद्र फडणवीस यांचा पुण्यात दौरा होता. त्याची तयारी म्‍हणून औंध येथील कार्यालयात आयुक्‍तांनी आढावा बैठक घेतली. या वेळी वरिष्ठ अधिकारी उपस्‍थित होते. त्‍यामुळे आकुर्डीतील मुख्यालयात जे कर्मचारी आले होते, ते निवांत असल्‍याचे दिसले.
शासनाच्या नियमानुसार कार्यालय सुरू असले तरी प्रत्यक्षात अनेक विभागात कर्मचारी अनुपस्थित होते. काही विभागांमध्ये मोजके कर्मचारी दिसत होते. काही विभागांचे दरवाजेच बंद होते. अनेक कर्मचारी कँटीनमध्ये चहापान आणि गप्पा मारण्यात रमले होते. अनेक विभागांबाहेर फक्त सुरक्षारक्षक दिसत होते. येणाऱ्या जाणाऱ्यांशी तेच संवाद साधत होते. अधिकारी नसल्‍याचे नागरिकांना तेच सांगत होते. त्‍यांच्‍यामुळे नागरिकांना निदान ही माहिती तरी मिळत होती.
महत्त्वाच्या कामांसाठी आलेल्या नागरिकांना वरिष्ठ अधिकारी, इतर कनिष्ठ अथवा संबंधित कर्मचारी नसल्यामुळे परत जावे लागले. काही जण सुमारे तीस किलोमीटरचा प्रवास करून आले होते. त्यामुळे परत जाताना त्यांना संताप अनावर झाला होता.
शुक्रवारी कामाचा दिवस असूनही मुख्यालय ठप्प होणे प्रशासनाच्या कार्यपद्धतीवर प्रश्नचिन्ह निर्माण करते. शनिवारी आणि रविवारी सुट्ट्या असल्यामुळे अनेक कर्मचाऱ्यांनी या संधीचा फायदा घेत ‘सुट्टी’ घेतल्याची चर्चाही ऐकू आली. या बाबत प्रशासनाच्या अधिकाऱ्यांशी संपर्क होऊ शकला नाही.
---
दोन दिवस सुट्टी, त्यात कुणीच नाही. आम्ही कामासाठी आलो आणि रिकाम्या हाताने परत जातोय. सगळे अधिकारी कामानिमित्‍त औंध येथील कार्यालयात गेले असल्‍याचे सांगण्यात आले.
- सुमीत वाघ, नागरिक
--------