रस्ता दुरुस्तीचा ‘इलाज’ महागात

चिखली, ता. २ : चिखली परिसरातील अंगणवाडी तसेच वाघू साने चौक ते चिंचेचा मळा रस्त्यावर मोठ्या प्रमाणात खड्डे पडले असून खड्डे बुजविण्यासाठी खडी टाकण्यात आली आहे. मात्र त्या खडीमधून वाहन चालवताना दुचाकीस्वार घसरून पडत आहेत. मोठ्या वाहनांच्या चाकांखालील खडे उडून नागरिक जखमी होत असल्याच्या घटना घडत आहेत.
चिखली परिसरातील बहुतांशी रस्त्यावर खड्डे पडून ते खराब झाले आहेत. तसेच महापालिकेने जलवाहिन्या आणि पावसाळी गटारी करण्यासाठी अनेक ठिकाणी खोदाई करून ठेवली आहे. मात्र, तेथील रस्त्यांची पूर्णपणे दुरुस्ती अद्याप झालेली नाही. रस्ते दुरुस्ती करण्यासाठी खड्ड्यांमध्ये आणि खोदलेल्या रस्त्यांवर खडी पसरविण्यात आली आहे. रस्त्यावर टाकण्यात आलेल्या खडीमुळे दुचाकी स्वार विशेषतः महिला दुचाकी चालवत असताना खडीवरुन घसरून पडत आहेत. वाहनांच्या टायर खाली येत असलेली खडी उडून ती पादचारी नागरिकांना लागून त्यांना जखमी करत आहे. त्यामुळे खडी आणि खड्डे असलेल्या ठिकाणी डांबर टाकून रस्ता दुरुस्ती करावा आणि होणारे अपघात टाळावेत, अशी मागणी नागरिकांच्यावतीने करण्यात येत आहे.

याबाबत लक्ष घालून खडी पडलेल्या ठिकाणी डांबर टाकण्याचे सूचना देण्यात येतील.
- व्ही.डब्ल्यू.वायकर, अभियंता (स्थापत्य)

‘‘चिखली परिसरातील रस्त्यांची अक्षरशः चाळण झाली आहे. या रस्त्याची कायमची दुरुस्ती करण्याऐवजी खडी टाकली जात आहे. मात्र, त्यामुळे मोठ्या प्रमाणात अपघात होत आहेत.
- विजय जरे, सामाजिक कार्यकर्ते