पिंपरी महापालिका मिळकतकर

नागरिकांनो ! घरबसल्या भरा मिळकतकर

महापालिकेचा निर्णय; ऑनलाइनसाठी नोंदणीकृत मोबाईलवर पाठविणार संदेश

पिंपरी, ता. १ ः नागरिकांना घरबसल्या ऑनलाइन मिळकतकर भरण्याची सुविधा महापालिकेने उपलब्ध करून दिली आहे. त्यासाठी मिळकतधारकांना मोबाईल क्रमांक लिंक करावा लागेल. त्यावर कस्टमाइज्ड पेमेंट लिंकचा संदेश पाठविण्यात येईल. त्या लिंकवर क्लिक केले की नागरिकांना मिळकतीचे बिल दिसेल. त्याची खातरजमा करून नागरिकांना कर भरता येईल, अशी सुविधा आहे.
शहरातील नागरिकांना घरबसल्या जास्तीत जास्त सुविधा देण्याचा महापालिकेच्या करआकारणी व करसंकलन विभागाचा प्रयत्न असतो. त्या अनुषंगाने करसंकलन विभागाकडून मिळकतकधारकांना ऑनलाइन मालमत्ता कर भरण्याची सुविधा दिली आहे. परंतु ऑनलाइन कर भरताना नागरिकांनी ज्या संकेतस्थळावर कर भरत आहोत ते महापालिकेचे अधिकृत संकेतस्थळ असल्याची खात्री करावी.

नागरिकांना आवाहन
महापालिकेकडे सात लाख ३१ हजार मिळकतींची नोंद आहे. करसंकलन विभागाच्या अनेक सेवा ऑनलाइन झाल्या आहेत. त्यामुळे ज्या नागरिकांनी अद्याप मालमत्ता बिलाशी मोबाईल क्रमांक जोडलेले नाहीत, त्यांनी तत्काळ जोडावेत. त्यानंतर सर्व सेवांचा लाभ घरबसल्या घेता येणार आहे, अशी माहिती करसंकलन विभागाचे सहायक आयुक्त अविनाश शिंदे यांनी केले आहे. सध्या ऑनलाइन मालमत्ता कर भरणाऱ्यांना सामान्य करात चार टक्क्यांची सवलत देण्यात येत असल्याचेही त्यांनी सांगितले.

ऑनलाइन सेवा
- कर भरणा
- मालमत्ता हस्तांतर
- मालमत्ता कर सवलत योजना
- थकबाकी नसल्याचा दाखला

नागरिकांना आधुनिक तंत्रज्ञानाच्या माध्यमातून सोप्या व जलद सेवा देणे, हा महापालिकेचा उद्देश आहे. नागरिकांना ऑनलाइन कर भरण्याच्या सुविधेचा लाभ घेतल्यामुळे नागरिकांचा वेळ वाचवणार आहे. भविष्यात अशीच आणखी सुलभ सेवा देण्याचा आमचा प्रयत्न राहील.
- प्रदीप जांभळे पाटील, अतिरिक्त आयुक्त, महापालिका

ज्या नागरिकांनी मोबाईल क्रमांक आपल्या मालमत्तेशी जोडलेले आहेत. त्यांना ऑनलाइन सेवांचा लाभ मिळत आहे. ज्यांनी अद्याप मोबाईल क्रमांक जोडले नाही, त्यांनी ते तत्काळ जोडून घ्यावे. जेणेकरून त्यांना घरबसल्या कर संकलन विभागाच्या सेवांचा लाभ घेता येईल.
- अविनाश शिंदे, सहायक आयुक्त, महापालिका