एमए मराठी उत्तीर्णांना दोन वेतनवाढ देणार

पिंपरी, ता. १० ः पिंपरी चिंचवड महापालिकेच्या दैनंदिन कामकाजामध्ये मराठी भाषेचा शंभर टक्के वापर व्हावा, व्यवहार अधिक सोपा, सुटसुटीत आणि अर्थपूर्ण भाषेत व्हावा, या उद्देशाने एम. ए. मराठी उत्तीर्ण कर्मचाऱ्यांना दोन विशेष वेतनवाढ देण्याचा ठराव विधी समितीने केला असून अंतिम मंजुरीसाठी सर्वसाधारण सभेसमोर ठेवण्यात येणार आहे. समिती बैठकीच्या अध्यक्षस्थानी सभापती सुजाता बोराटे होत्या. नगरसेवक ज्ञानेश्वर जगताप, कुशाग्र कदम, वर्षा जगताप, तुषार सहाणे, कुंदा भिसे, शेखर चिंचवडे आदींसह सहआयुक्त मनोज लोणकर, उपायुक्त राजेश आगळे उपस्थित होते.