चिंचवडमध्ये शुक्रवारी ‘संभव २०२६’ रंगणार

पिंपरी, ता. १३ ः धावपळीच्या जीवनशैलीत ताण-तणाव विसरून स्वतःच्या शारीरिक आणि मानसिक स्वास्थ्याशी पुन्हा नाते जोडण्यासाठी चिंचवडमध्ये येत्या शुक्रवारी (ता.१६) ‘संभव २०२६’ या विशेष कार्यक्रमाचे आयोजन करण्यात आले आहे.
चिंचवड येथील एल्प्रो मॉल ऑडिटोरिअम येथे सायंकाळी ७.३० वाजता हा कार्यक्रम होणार असून त्यामध्ये डॉ. विद्याधर कुंभार यांचे मार्गदर्शन लाभणार आहे. या कार्यक्रमात आयुर्वेद, कथा आणि संगीताच्या माध्यमातून मन व शरीर यांचा संबंध समजावून सांगण्यात येणार आहे. दैनंदिन जीवनशैलीत साधे-सोपे बदल करून मानसिक शांतता कशी मिळवावी, याचे मार्गदर्शन केले जाणार आहे. डॉ. कुंभार हे गेली अनेक वर्षे आयुर्वेद जनजागृती, आरोग्य शिक्षण व संशोधन यासाठी कटाक्षाने कार्यरत आहेत. आयुर्वेद विषय व भारतीय ज्ञान प्रणाली यांचा अभ्यास व प्रसार यासाठी ते ‘संभव’ द्वारे नियमितपणे कार्यक्रम आयोजित करत असतात. ब्रेन ॲण्ड ब्राऊन या ॲनिमेशन पेजची निर्मिती केली असून त्याद्वारे आयुर्वेदातील संकल्पना सोप्या, आकर्षक आणि समजण्यासारख्या पद्धतीने तरुणांपर्यंत पोहोचविण्याचे काम ते करतात.