निवडणूक काळात गैरहजर राहिल्याने पाच पोलिस निलंबित

पिंपरी, ता. १५ : निवडणूक काळात सतत गैरहजर राहिल्याने पिंपरी चिंचवड शहर पोलिस दलातील पाच पोलिसांना निलंबित करण्यात आले. याबाबतचे आदेश पोलिस आयुक्त विनयकुमार चौबे यांनी दिले आहेत. हे सर्वजण पोलिस मुख्यालयात नेमणुकीस आहेत.
पोलिस हवालदार संजय केळकर, सागर बाविस्कर, पोलिस शिपाई जगन्नाथ शिंदे, संतोष जाधव, प्रतिभा गावडे अशी निलंबित केलेल्या पोलिसांची नावे आहेत. हे अंमलदार मागील काही महिन्यांपासून रजेवर गेले आहेत. त्यांना पोलिस मुख्यालयाकडून वेळोवेळी पत्र पाठवून कर्तव्यावर हजर राहण्याच्या सूचना दिल्या होत्या. मात्र त्याकडे त्यांनी दुर्लक्ष केले. त्यामुळे पोलिस आयुक्तांनी ही कारवाई केली.