जवण-अजिवली मार्गावर एस.टी. व मालवाहतूक गाडीचा अपघात

पवनानगर, ता. २९ ः जवण-अजिवली रस्त्यावरील तीव्र उताराच्या वळणावर शनिवारी सकाळी एस. टी. बस आणि मालवाहतूक गाडीचा अपघात झाला. अपघातात कोणालाही दुखापत झाली नसून, दोन्ही वाहनांचे थोडे नुकसान झाल्याची माहिती स्थानिकांनी दिली.
शिळींब कडून येणारी बस कमी वेगात होती. मात्र, मालवाहतूक गाडी अतिवेगात असल्याने वळणावर वेग कमी न झाल्याने चालकाचा अंदाज चुकला दोन्ही वाहनांचा किरकोळ धक्का बसला. स्थानिकांच्या म्हणण्यानुसार, या रस्त्यावर अनेक ठिकाणी चढ-उतार असून मालवाहतूक गाड्या वारंवार अतिवेगाने धावत असल्याने या आधीही अपघाताच्या घटना टळल्या आहेत. ग्रामस्थांनी या रस्त्यावर वेगमर्यादा व नियंत्रणासाठी उपाययोजना कराव्यात, अशी मागणी प्रशासनानाकडे केली आहे.