काम पूर्ण, तरीही रस्ता बंदच

रावेत, ता. १ : रावेत मुकाई चौक ते भक्ती शक्ती चौक या बीआरटी मार्गाचे काम पूर्ण झाले आहे. पण, तो अजूनही प्रवासासाठी खुला करण्यात आलेला नाही. येथील वाहतूक सिग्नल, रस्त्यावरील मार्किंग आणि सुरक्षा बॅरिकेट्सची उभारणी पूर्ण झाली आहे. पण, उद्घाटन करण्यासाठी प्रशासन नेमकी कोणाची वाट पाहत आहे, असा प्रश्न नागरिक विचारत आहेत.
या ‘बीआरटी’ मार्गाचे काम जवळपास दोन वर्षांपूर्वी सुरू करण्यात आले होते. दरम्यान, अनेकदा अर्धवट कामामुळे वाहतुकीस अडथळा निर्माण झाला होता. मात्र, आता काम पूर्ण झाल्यानंतरही मार्ग सुरू न झाल्याने वाहतूक कोंडी आणि वेळेचा अपव्यय नागरिकांना सहन करावा लागत आहे. विशेषतः मुकाई चौक, म्हस्के वस्ती, आणि भक्ती शक्ती चौक या भागात वाहनांची गर्दी वाढत आहे. ‘‘या रस्त्यावरील बॅरिकेड्मुळे वाहतूक मार्ग अपुरा पडत आहे. त्यामुळे काही मिनिटांच्या प्रवासासाठी अर्धा तास लागतो,’’ अशी प्रतिक्रिया वाहनचालक सचिन भोसले यांनी दिली.
प्रवासी पूनम देशमुख म्हणाल्या, ‘‘रावेतहून भक्ती शक्ती चौकापर्यंत बीआरटी बस मार्ग खुला झाल्यास प्रवास सोपा होईल आणि वाहतूक नियंत्रण सुलभ होईल. पण, काम पूर्ण होऊन महिनाभर झाला तरी प्रशासनाकडून प्रतिसाद नाही.’’
पालिका वाहतूक विभागातील अधिकाऱ्यांनी सांगितले की, ‘‘रस्त्याच्या शेवटच्या तांत्रिक तपासणीसाठी आणि सुरक्षेच्या प्रमाणपत्रासाठी काही प्रक्रिया सुरू आहेत. या प्रक्रिया पूर्ण झाल्यानंतर बीआरटी मार्ग सार्वजनिक वाहतुकीसाठी खुला करण्यात येईल.’’
दरम्यान, ‘‘स्थानिक सामाजिक संस्थांनीही प्रशासनाचे लक्ष वेधले असून, काम पूर्ण झाले, मग उद्घाटन केव्हा, असा प्रश्न उपस्थित केला आहे.’’