राज्यस्तरीय स्पर्धेसाठी आरती पवार हिची निवड

रावेत, ता. १८ ः पिंपरी चिंचवड महापालिकेच्या माध्यमिक विद्यालय केशवनगर (भाग शाळा, रावेत) शाळेतील विद्यार्थिनी आरती पवार हिने रग्बी खेळात उल्लेखनीय कामगिरी केली आहे. त्यामुळे तिची शालेय क्रीडा स्पर्धा २०२५-२६ मधील राज्यस्तरीय स्पर्धेसाठी निवड झाली आहे. १९ वर्षांखालील मुलींच्या विभागीय स्पर्धा नुकत्याच कोपरगाव, जिल्हा अहिल्यानगर येथे पार पडल्या. तेथील उत्कृष्ट कामगिरीमुळे आरतीची राज्यस्तरीय स्पर्धेसाठी निवड झाली.
या यशाबद्दल शाळेचे मुख्याध्यापक रामदास चपटे, भागशाळा प्रमुख रामेश्वर पवार यांनी आरतीचे अभिनंदन केले. प्राथमिक शाळेच्या मुख्याध्यापिका सायरा शिकलगार, क्रीडा मार्गदर्शिका पूनम देवकाते, क्रीडा शिक्षिका वृषाली शिरसाट यांनी आरतीला मार्गदर्शन केले. या निवडीबद्दल तिचा सत्कार करण्यात आला. यावेळी भागशाळेतील पूजा रोकडे, प्रज्ञा उके, महेंद्र वानखडे, अर्शिया शेख यांच्यासह सर्व शिक्षक उपस्थित होते.
आरतीचे वडील अमरेश पवार म्हणाले, ‘‘आमच्यासारख्या सामान्य कुटुंबातील मुलांना पालिका शाळेत उत्तम शिक्षणासोबत क्रीडा संधी मिळत आहे. माझ्या मुलीने राज्य पातळीवर चमक दाखवली ही आमच्यासाठी अभिमानाची बाब आहे.’’