तळेगाव दाभाडे नगरपरिषदेचे ‘हर घर तिरंगा २०२५’ उपक्रमात सहभागी होण्याचे आवाहन

तळेगाव दाभाडे नगरपरिषदेचे ‘हर घर तिरंगा २०२५’ उपक्रमात सहभागी होण्याचे आवाहन

तळेगाव दाभाडे, ता. ११ : भारतीय स्वातंत्र्याला ७९ वर्षे पूर्ण होत असल्याच्या पार्श्वभूमीवर ‘हर घर तिरंगा-२०२५’ हा उपक्रम देशभर १३ ते १५ ऑगस्ट दरम्यान राबविण्यात येणार आहे.
मोहिमेत सहभागी होण्यासाठी नगर परिषद प्रशासन संचालनालयाच्या सूचनेनुसार प्रत्येक नागरिकाने आपल्या घरावर तसेच सर्व शासकीय, निमशासकीय, खासगी आस्थापना, सहकारी संस्था आणि शैक्षणिक संस्थांच्या इमारतींवर राष्ट्रध्वज फडकवावा, असे आवाहन नगरपरिषदेचे मुख्याधिकारी विजयकुमार सरनाईक यांनी केले आहे.
उपक्रमाच्या दरम्यान तिरंग्यासोबत स्वतःचा छायाचित्र काढून #हरघरतिरंगा२०२५ या ओळखचिन्हासह समाज माध्यमांवर प्रसारित करावे, तसेच www.हरघरतिरंगा.com या संकेतस्थळावर छायाचित्र पाठवून प्रमाणपत्र मिळवावे, असेही आवाहन करण्यात आले आहे.
तिरंगा फडकविण्याबाबत महत्त्वाच्या सूचना
राष्ट्रध्वज संहितेचे पालन करणे आवश्यक.
केशरी रंग वरच्या बाजूस असावा.
अभियानानंतर तिरंगा सन्मानाने सुरक्षित ठेवावा, फेकू नये. फाटलेला, कापलेला किंवा अर्धा झुकलेला तिरंगा वापरू नये. नगर परिषदेने नागरिकांना आवाहन केले आहे की, स्वातंत्र्याचा अभिमान जपण्यासाठी व देशभक्तीची भावना दृढ करण्यासाठी प्रत्येक घरावर तिरंगा फडकवून उपक्रमात उत्स्फूर्त सहभाग नोंदवावा.