तळेगाव दाभाडेत आजपासून राज्यस्तरीय वेटलिफ्टिंग स्पर्धा

तळेगाव दाभाडे, ता. २३ : महाराष्ट्र राज्य वेटलिफ्टिंग संघटनेच्या मान्यतेने व पुणे जिल्हा वेटलिफ्टिंग संघटनेच्या सौजन्याने तळेगाव दाभाडे येथील सुशीला मंगल कार्यालयात बुधवारपासून (ता. २४) राज्यस्तरीय स्पर्धेला प्रारंभ होत आहे. ही स्पर्धा २६ डिसेंबरपर्यंत चालेल.
तीन दिवसीय स्पर्धेत १७ वर्षांखालील मुले, २० वर्षांखालील मुले तसेच वरिष्ठ गट मुले-मुली अशा विभागांमध्ये आठ वजनी गट असतील. स्पर्धेत राज्यातील २७ जिल्ह्यांमधून २८० मुले व १६३ मुली असे एकूण ४४३ खेळाडू सहभागी होत आहे. ५० राष्ट्रीय व आंतरराष्ट्रीय दर्जाचे पंच स्पर्धेचे कामकाज पाहणार आहेत. आंतरराष्ट्रीय दर्जाच्या खेळाडूंचा सहभाग स्पर्धेचे आकर्षण ठरले आहे. या स्पर्धेतून आगामी राष्ट्रीय स्पर्धेसाठी महाराष्ट्राचा युवा, कुमार आणि वरिष्ठ गटांतील संघ निवडण्यात येणार आहे. राष्ट्रीय स्पर्धा फेब्रुवारी महिन्याच्या पहिल्या आठवड्यात मोदीनगर येथे होणार आहे.
राज्यभरातील उदयोन्मुख व अनुभवी खेळाडूंसाठी ही स्पर्धा गुणवत्ता सिद्ध करण्याची मोठी संधी ठरणार आहे, असे आयोजकांनी सांगितले.
-----