आणखी एक अजगर सुरक्षितपणे नैसर्गिक अधिवासात

टाकवे बुद्रुक, ता. २९ : मावळातील बोरज गावात सुमारे दहा फूट लांबीचा अजगर आढळला होता. ‘वन्यजीवरक्षक मावळ’च्या सदस्यांनी त्याला पकडून नैसर्गिक अधिवासात सोडले.
बोरज गावातील स्मशानभूमी परिसरात २८ जूनच्या रात्री नीलेश बांगर यांना रस्त्याच्या बाजूला अजगर दिसला. त्यांनी याबाबत ग्रामस्थ पप्पू केदारी व बोरज गावचे पोलिस पाटील दिनेश केदारी यांना माहिती दिली. केदारी यांनी तत्काळ वन्यजीवरक्षक दक्ष काटकर यांना ही माहिती कळविली. त्यावर काटकर यांच्यासह अनिल आंद्रे, यश वाडेकर तेथे आले. सदर अजगर हा रस्त्याबाजूला झुडपांत होता. आंद्रे आणि काटकर यांनी त्याला काळजीपूर्वक पकडून त्याची नैसर्गिक अधिवासात सोडले. यावेळी पोलिस पाटील दिनेश केदारी, ग्रामस्थ नवनाथ कडू, तेजस केदारी, सोमनाथ केदारी, रवी केदारी, अमर कडू, अनिल केदारी, विठ्ठल ठुले, मनोज मांडेकर, पांडुरंग मोहळ, ओमकार केदारी यांनीही मदत करून आभार मानले.
‘‘गेल्या वर्षी याच बोरज गावाशेजारील डोंगरभागात सुमारे १५ फूट लांबीचा अजगर आढळला होता. पावसाचे प्रमाणे अधिक असल्याने अजगर हे मानवी वस्तीकडे येत आहेत,’’ असे यावेळी प्राणीमित्रांनी सांगितले.