जागतिक टपाल दिनानिमित्त आरोग्य तपासणी शिबिर

तळेगाव स्टेशन, ता.८ : जागतिक टपाल दिनानिमित्त यशवंतनगर येथील टपाल कार्यालयातील कर्मचाऱ्यांसाठी मोफत आरोग्य तपासणी शिबिर पार पडले. रक्तदाब, मधुमेह तपासणी, वजन-उंची प्रमाण तपासणी करून जीवनशैली विषयक सल्ला तसेच होमिओपॅथिक आरोग्य सल्ला या शिबिरात देण्यात आला. कर्मचाऱ्यांना त्यांच्या कामाच्या स्वरूपामुळे होणारा ताण, झोपेची कमतरता व आहारासंबंधी मार्गदर्शन करण्यात आले. डॉ. सायली फुटाणे यांनी नियमित आरोग्य तपासणीचे महत्त्व आणि संतुलित आहार व व्यायामाचे फायदे स्पष्ट केले. टपाल कार्यालयाच्या मुख्य पोस्ट मास्तर प्रेरणा मेश्राम यांच्यासह अधिकारी, कर्मचाऱ्यांनी आभार मानले.