तळेगाव-शिक्रापूर महामार्गाची निविदा प्रक्रिया प्रगतिपथावर

तळेगाव स्टेशन, ता. १३ ः ‘‘पुणे रिंगरोडच्या पश्चिम विभागातील कामे मे २०२७ पर्यंत आणि पूर्व भागातील कामे २०२८ पर्यंत पूर्ण होणे अपेक्षित आहे. तळेगाव-चाकण-शिक्रापूर महामार्गाच्या कामाची निविदा प्रक्रिया प्रगतिपथावर आहे. त्यावरील सुरळीत वाहतुकीसाठी प्रयत्न चालू आहेत. तात्पुरत्या स्वरुपातील उपयोजनांबाबतची शक्यता तपासून घेतली जाईल,’’ असे मंत्री दादा भुसे यांनी सांगितले.
पुणे व पिंपरी चिंचवड शहरांभोवतीचा रिंगरोडच्या कामाची सद्यःस्थिती आणि तळेगाव-चाकण-शिक्रापूर महामार्गाच्या कामांचा पूर्ण होण्याचा कालावधी यासंदर्भात शुक्रवारी (ता. १२) मावळचे आमदार सुनील शेळके यांनी विधिमंडळाच्या हिवाळी अधिवेशनात विचारणा केली. हे काम पूर्ण होईपर्यंत अस्तित्वातील रस्त्यावर तात्पुरत्या स्वरूपात उपाययोजना करण्याची मागणीही केली. त्यावर उत्तर देताना भुसे बोलत होते.
आमदार शेळके म्हणाले, ‘‘तळेगाव-चाकण-शिक्रापूर महामार्गासाठी निविदा भरण्याची अंतिम तारीख २२ डिसेंबर आहे. त्यानंतर निविदा प्रक्रिया आणि कार्य आदेश काढण्यासाठी किमान तीन महिन्यांचा कालावधी जाईल. महामार्गाचे काम पूर्ण होण्यास दोन अडीच वर्षे लागण्याची शक्यता आहे. तोपर्यंत अस्तित्वातील रस्त्याच्या ताब्यातील जागेतील बाजूपट्ट्यांसह रस्त्याचे मजबुतीकरण करून तत्काळ प्रश्न मार्गी लावणार आहेत का? खड्डे दुरुस्ती करून छेद रस्त्यांच्या ठिकाणी त्वरित व्यवस्था, उपाययोजना करणार का?’’
---