वडगावच्या विकास आराखड्यात बदल करा

वडगाव मावळ, ता. ९ : ‘‘वडगाव शहराचा विकास आराखडा आर्थिक हित साधून तयार करण्यात आला आहे. यामध्ये सुमारे तीस कोटी रुपयांचा भ्रष्टाचार झाला आहे,’’ असा आरोप मनसेचे माजी तालुकाध्यक्ष रुपेश म्हाळसकर यांनी केला. ‘‘आराखड्यात बदल न केल्यास जनआंदोलन उभारू’’ असा इशाराही यावेळी देण्यात आला.
नगरपंचायतीने प्रसिद्ध केलेल्या सुधारित विकास आराखड्यातील त्रुटी निदर्शनास आणून देण्यासाठी म्हाळसकर यांनी पत्रकार परिषद आयोजित केली होती. व्यापारी असोसिएशनचे पदाधिकारी झुंबरलाल कर्नावट, मनसेचे पदाधिकारी तानाजी तोडकर उपस्थित होते.
‘‘प्रारूप विकास आराखडा प्रसिद्धीपूर्वी ९९ बदल हे कोणालाही विश्वासात न घेताआणि परस्पर केले गेले. यावर ६५० हरकती व सूचना आल्या. त्यातील ४३ आरक्षणांत बदल करण्यात आले. औपचारिकता म्हणून सुनावणी घेण्यात आली,’’असा आरोप यावेळी करण्यात आला.
पवित्र जैन स्थानकावरील आरक्षणे हटवावीत. बाजारपेठेत रस्ता आणि गावठाण हद्दीतील उप रस्त्यांची रुंदी कमी करावी. पुन्हा सर्वेक्षण करून नवीन शहर प्रारुप विकास आराखडा तयार करावा,’’ आदी मागण्या यावेळी मांडण्यात आल्या.