प्राथमिक शिक्षक पतसंस्थेच्या वतीने शाळा, गुणवंत विद्यार्थ्यांचा सन्मान

वडगाव मावळ, ता. १ : मावळ तालुका प्राथमिक शिक्षक पतसंस्थेच्या ९५व्या वार्षिक सर्वसाधारण सभेत उत्कृष्ट कामगिरी केलेल्या शाळा व गुणवंत विद्यार्थ्यांचा सन्मान करण्यात आला. सभासदांना ८.७० टक्के लाभांश जाहीर करण्यात आला.
मावळ तालुका प्राथमिक शिक्षक पतसंस्थेची वार्षिक सर्वसाधारण सभा भेगडे लॉन्स मंगल कार्यालयात आयोजित करण्यात आली होती. अध्यक्षस्थानी पतसंस्थेचे अध्यक्ष अनिल कळसकर होते. माजी सभापती गुलाबराव म्हाळसकर, माजी उपसभापती शांताराम कदम, राष्ट्रवादी महिला आघाडी अध्यक्षा सुवर्णा राऊत, शिक्षक संघटनेचे सल्लागार वि. म. शिंदे, बाबासाहेब औटी, रघुनाथ रोकडे, सुहास विटे, शिक्षक संघटनेचे जिल्हा अध्यक्ष नारायण कांबळे, माजी विस्तार अधिकारी शोभा वहिले, सर्व शिक्षक संघटनांचे अध्यक्ष, सर्व केंद्रप्रमुख व संचालक मंडळ उपस्थित होते.
पतसंस्थेच्या वतीने सभासदांना ८.७० टक्के लाभांश जाहीर करण्यात आला. सभेत जिल्हा परिषद उत्कृष्ट शिक्षक पुरस्कार प्राप्त शिक्षक, तालुक्यातील विविध क्षेत्रात पदवी प्रदान केलेले शिक्षक, सेवापुर्ती शिक्षक, मार्गदर्शक शिक्षक, तालुक्यातील आय.एस.ओ. मानांकित शाळा, मुख्यमंत्री माझी सुंदर शाळा, एम.पी.एस.सी, यु.पी.एस.सी. उत्तीर्ण विद्यार्थी, क्रिडा व सांस्कृतिक स्पर्धेतील यशस्वी विद्यार्थी, तालुका क्रिडा स्पर्धा आयोजक, शिष्यवृत्ती उत्तीर्ण विद्यार्थी, दहावी, बारावी, पदवीधर विद्यार्थी, कौतुकास्पद कामगिरी करणारे विद्यार्थी, जवाहर नवोदय विद्यालयामध्ये निवड झालेले तसेच इस्त्रो अभ्यास दौऱ्यासाठी निवड झालेले विद्यार्थी आदींचा सत्कार करण्यात आला. पतसंस्थेच्या उपाध्यक्ष संगिता शिरसट यांनी प्रास्ताविक केले. संचालक नितीन वाघमारे यांनी सूत्रसंचालन केले. कार्यकारी संचालक प्रमोद भोईर यांनी आभार मानले. पतसंस्थेचे ७०९ शिक्षक सभासद असून, भाग भांडवल २५ कोटी रुपये आहे. संस्थेच्या १४ कोटी रुपयांच्या मुदत ठेवी असून, पतसंस्थेची कर्जमर्यादा २४ लाख रुपये करण्यात आली आहे.
---