राष्ट्रीय कुस्तीगीर चंद्रकांत सातकर अनंतात विलीन

वडगाव मावळ, ता. १२ : तालुक्यातील काँग्रेसचे ज्येष्ठ नेते व जुन्या काळातील राष्ट्रीय कुस्तीगीर चंद्रकांत आप्पासाहेब सातकर यांच्या पार्थिवावर मंगळवारी कान्हे येथे अंत्यसंस्कार करण्यात आले. यावेळी अनेक मान्यवरांनी त्यांच्या राजकीय व कुस्ती क्षेत्रातील कामगिरीचे स्मरण करत श्रद्धांजली अर्पण केली.

पहिलवान चंद्रकांत सातकर (वय ८४ वर्षे) यांचे सोमवारी पुण्यात निधन झाले. त्यांच्या पार्थिवाला मुलगा अजित यांनी अग्नि दिला. काँग्रेसचे ज्येष्ठ नेते माजी महसूल मंत्री बाळासाहेब थोरात, माजी परिवहन मंत्री डॉ. सतीश पाटील, माजी मंत्री मदन बाफना, बाळा भेगडे, जेष्ठ नेते माऊली दाभाडे, शंकरराव शेळके, बापूसाहेब भेगडे, गणेश खांडगे, रामदास काकडे, बाळासाहेब नेवाळे, पहिलवान मारुती आडकर, पहिलवान अमोल बुचुडे, विजय जाधव, संग्राम मोहोळ, नरहरी चोरगे, के.पी.पाटील, बाबुराव वायकर, संभाजी राक्षे, बाळासाहेब ढोरे, यशवंत मोहोळ, राजू खांडभोर आदींसह कुस्तीसह विविध क्षेत्रांतील तज्ज्ञ, राजकीय पक्षांचे पदाधिकारी व मोठ्या संख्येने नागरिक उपस्थित होते.
यावेळी अनेकांनी सातकर यांच्या आठवणींना उजाळा दिला. अनेकांनी त्यांच्या स्वभाव वैशिष्ट्यांचा आवर्जून उल्लेख केला.

बाळासाहेब थोरात म्हणाले, ‘‘सातकर हे काँग्रेसचे निष्ठावंत कार्यकर्ते होते. प्रामाणिक, निर्मळ व सज्जन असे त्यांचे व्यक्तिमत्व होते. संपूर्ण महाराष्ट्रातील कार्यकर्ते त्यांना ओळखत होते. त्यांच्यावर पुस्तक तयार करण्याची सूचना त्यांनी केली.’’

सतीश पाटील म्हणाले, ‘‘सातकर यांनी अगदी निष्ठेने राजकारण केले. कुस्ती क्षेत्रात आपला दबदबा निर्माण केला व नातीही जपण्याचे काम केले.’’ मदन बाफना, बाळा भेगडे, बापूसाहेब भेगडे, रामदास काकडे यांनी सातकर यांच्यातील खिलाडू वृत्तीचा आवर्जून उल्लेख केला. हिरामण सातकर यांनी ऋणनिर्देश व्यक्त केले. गुलाब वाघोले व अतुल सातकर यांनी सूत्रसंचालन केले.