लोहगड, विसापूर किल्ल्यावर अभिषेकाची परंपरा कायम

वडगाव मावळ, ता. १९ : श्री शिवाजी रायगड स्मारक मंडळ संचलित लोहगड विसापूर विकास मंचाच्या वतीने गेल्या २५ वर्षांपासून लोहगड किल्ल्यावरील शिवमंदिरात, तसेच गेल्या दहा वर्षांपासून विसापूर किल्ल्यावरील शिवमंदिरात श्रावणी सोमवारनिमित्त अभिषेक करण्यात येतो. ही परंपरा या वर्षीही कायम राहिली.
विसापूर किल्ल्यावरील अभिषेकाचे नियोजन अध्यक्ष विश्वास दौंडकर, कार्याध्यक्ष सागर कुंभार, अनिकेत आंबेकर, अजय मयेकर, सागर दळवी, अनिकेत घरदाळे, बाळकृष्ण कोंडभर, मुकुंद तिकोने, चेतन जोशी यांनी केले. तसेच लोहगडावरील अभिषेकाचे नियोजन संस्थापक सचिन टेकवडे, मार्गदर्शक संदीप गाडे, कैलास वाघमारे, मंगेश रवणे, सचिन निंबाळकर, गणेश उंडे, बसप्पा भंडारी, अमोल गोरे, ओंकार मेढी, सिद्धू जाधव यांनी केले.

जीर्णोद्धाराची गरज
लोहगड किल्ल्यावरील शिव मंदिराभोवतीची दगडी तटबंदी नामशेष झाली आहे. तसेच, विसापूर किल्ल्यावरील शिवमंदिराच्या छतावरील पत्रे कधीही कोसळतील अशा अवस्थेत आहेत. पत्राच्या आतील लाकूड पूर्णपणे कुजले आहेत. याकडे पुरातत्व विभागाने लक्ष द्यावे. दोन्ही किल्ल्यांवरील शिवमंदिरे गतवैभव प्राप्त करतील, अशा प्रकारचे जीर्णोद्धाराचे काम भारतीय पुरातत्व विभागाने करावे, असे आवाहन मंचाचे संस्थापक सचिन टेकवडे यांनी यावेळी केले.