पेन्शनधारकांचा गुरुवारी वडगावात मोर्चा

वडगाव मावळ, ता. २१ : पेन्शनधारकांच्या विविध मागण्यांकडे शासनाचे लक्ष वेधण्यासाठी मावळ तालुका इपीएस ९५ निवृत्त कर्मचारी समन्वय समितीच्या वतीने गुरुवारी (ता. २५) वडगाव येथील तहसील कार्यालयावर मोर्चा काढण्यात येणार असल्याची माहिती समितीचे तालुकाध्यक्ष दशरथ ढोरे, सचिव विजयकुमार राऊत व संघटक मनोहर बागेवाडी यांनी दिली.
इपीएस ९५ राष्ट्रीय संघर्ष समिती ही वृद्ध पेन्शनधारकांची संघटना देशातली २७ राज्यात कार्यरत आहे. पेन्शनधारकांच्या न्याय्य हक्कांसाठी ही समिती गेल्या दहा वर्षांपासून केंद्र सरकारकडे विविध प्रकारची आंदोलने, चर्चा आदी विविध मार्गांनी पाठपुरावा करत आहे. पंतप्रधान, केंद्रीय वित्तमंत्री व श्रममंत्री यांच्याशी अनेकवेळा चर्चा होऊनही सकारात्मक निर्णय होत नाही. त्यामुळे शासनाचे लक्ष वेधण्यासाठी विविध कार्यालयांवर मोर्चे व आंदोलन करण्याचा निर्णय संघटनेने घेतला आहे. त्याच अनुषंगाने मावळ तालुका इपीएस ९५ निवृत्त कर्मचारी समन्वय समितीच्या वतीने गुरुवारी (ता. २५) सकाळी ११ वाजता वडगाव येथील तहसील कार्यालयावर मोर्चा काढण्यात येणार आहे. या आंदोलनात तालुक्यातील ६० ते ८० वयोगटातील पेन्शनधारक सहभागी होणार आहेत.
---