भंडारा डोंगरावर हरिनाम सप्ताहाचे आयोजन

वडगाव मावळ, ता. ११ : श्री क्षेत्र भंडारा डोंगरावर २७ डिसेंबर २०२५ ते तीन जानेवारी २०२६ दरम्यान गाथा पारायण सोहळा व अखंड हरिनाम सप्ताहाचे आयोजन करण्यात आले आहे.
विनायक महाराज कांबेकर व गुरुवर्य बाळाराम महाराज कांबेकर प्रतिष्ठानच्या वार्षिक सामुदायिक पारायण व हरिनाम सप्ताहाचे हे ६७ वे वर्ष आहे. बाळाराम महाराज कांबेकर यांच्या आशीर्वादाने आयोजित या हरिनाम सप्ताहाची सुरवात रामभाऊ कराळे पाटील यांच्या हस्ते पादुका पूजनाने होणार आहे. माऊली जनार्दन जंगले हे व्यासपीठाचे नेतृत्व करणार आहेत.
सप्ताह काळात दररोज पहाटे काकड आरती, सकाळी आठ ते १२ व दुपारी तीन ते पाच गाथा पारायण, सायंकाळी सहा ते सात हरिपाठ, सायंकाळी सात ते नऊ कीर्तन व त्यानंतर जागर असा दिनक्रम राहील. सप्ताहात लक्ष्मण महाराज साष्टे, दत्तात्रेय महाराज टेमघरे, विश्वनाथ महाराज साळुंखे, वासुदेव महाराज चोरघे, राजेश महाराज घावरे, गोपीनाथ महाराज पाटील, सच्चिदानंद महाराज कांबे यांची कीर्तने होतील. तीन तारखेला सकाळी दहा ते १२ या वेळेत डॉ. यशोधन महाराज साखरे यांचे काल्याचे कीर्तन होईल. पंचक्रोशीतील भाविकांनी याचा लाभ घ्यावा असे आवाहन टेमघरे यांनी केले आहे.