Ram Charan: साऊथ सुपरस्टार राम चरणचा मानद डॉक्टरेट पदवी देऊन सन्मान, पत्नी झाली भावूक

Ram Charan: साऊथ इंडस्ट्रीमधील सुपरस्टार अभिनेता राम चरणचा (Ram Charan) नुकताच मानद डॉक्टरेट देऊन सन्मान करण्यात आला. वेल्स युनिव्हर्सिटीमधून त्याला ही डॉक्टरेटची मानद पदवी देऊन सन्मानित करण्यात आलं. त्याची पत्नी उपासनाने सोशल मीडियावर या सोहळ्याचे फोटो शेअर करत तिचा आनंद व्यक्त केला. तर वेल्स युनिव्हर्सिटीने सुद्धा सोशल मीडियावर या सोहळ्याचे फोटोज शेअर करत ही बातमी जाहीर केली.

अभिनेता राम चरणने सोशल मीडियावर त्याचे डॉक्टरेट स्वीकारतानाचे फोटोज शेअर केले आणि त्याला " वेल्स युनिव्हर्सिटीकडून ही मानद डॉक्टरेट स्वीकारताना मला आनंद होतोय. चेन्नईची जनता आणि माझ्या या प्रवासात सहभागी झालेल्या प्रत्येकाचा मी ऋणी आहे. अशीच स्वप्नं आणि नवीन यश पूर्ण होवोत." असं कॅप्शन दिलं आहे. तर त्याची पत्नी उपासनाने त्याच्या सोबतचे फोटोज शेअर करत त्याचा अभिमान वाटत असल्याच्या भावना व्यक्त केल्या. "डॉ. राम चरण कोनीडेला. तुझा खूप अभिमान वाटतोय. " असं तिने कॅप्शनमध्ये म्हंटलं आहे.

चित्रपट क्षेत्रातील भरीव योगदानासाठी डॉक्टरेट ऑफ लिटरेचर ही पदवी देऊन राम चरणचा सन्मान करण्यात आला. वेल्स युनिव्हर्सिटीच्या चौदाव्या दीक्षांत समारंभात राम चरणचा हा सन्मान करण्यात आला. या आधी भारताच्या अर्थमंत्री निर्मला सीतारामन यांनाही वेल्सतर्फे डॉक्टरेट देऊन सन्मानित करण्यात आलं आहे. राम चरणसोबतच यंदा चांद्रयान मोहिमेत सहभागी असलेले इस्रोचे डॉ. पी. वीरूमुथुवेल यांचाही सन्मान करण्यात आला.

राम चरणने त्याच्या या कामगिरीची पोस्ट शेअर करताच त्याचे कुटूंब, मित्रपरिवार आणि चाहत्यांनी कमेंट्स करत त्याच्यावर अभिनंदनाचा वर्षाव केला. सर्व स्तरातून त्याच्यावर शुभेच्छांचा वर्षाव होतोय. सोशल मीडियावर या दीक्षांत समारंभाचा व्हिडीओ व्हायरल झाला आहे.

पहा व्हिडीओ:

सध्या प्रोफेशनल फ्रंटवर राम चरण त्याची आगामी फिल्म 'गेम चेंजर' च्या कामात बिझी आहे. या सिनेमात अभिनेत्री कियारा अडवाणीचीसुद्धा मुख्य भूमिका आहे. या सिनेमाचं बजेट तब्बल १७० कोटी रुपये इतकं आहे.