मुंबई : ‘सकाळ प्रीमियर पुरस्कारा’ची नामांकने जाहीर झाल्यानंतर आता सर्वांनाच विजेत्यांच्या नावाचे वेध लागले आहे. गेल्या वर्षभरात अनेक दर्जेदार कलाकृतींनी मराठी चित्रपटससृष्टीवर आपला ठसा उमटवला. अनेक कलाकारांनी आपल्या सशक्त अभिनयाची झलक दाखवली. साहजिकच यंदाच्या विजेत्यांची कामगिरी मोलाची ठरली आहे.
अभिनेता संतोष जुवेकरच्या अभिनयाची दखल घेत ‘रावरंभा’ चित्रपटासाठी त्याला सर्वोत्कृष्ट खलनायकाच्या पुरस्काराने गौरविण्यात येणार आहे. अभिनेत्री गौरी देशपांडे आणि प्रियदर्शनी इंदलकर यांना अनुक्रमे ‘श्यामची आई’ अन् ‘फुलराणी’साठी ‘सर्वोत्कृष्ट पदार्पण चेहरा’ पुरस्कार जाहीर झाला आहे.
प्रीमियर पुरस्कारांची नामांकने जाहीर झाली असून सर्वोत्कृष्ट चित्रपट आणि दिग्दर्शकाच्या स्पर्धेत ‘आत्मपॅम्फ्लेट’, ‘महाराष्ट्र शाहीर’ आणि ‘नाळ २’ आघाडीवर आहेत. नामांकने जाहीर झाल्यापासून मराठी चित्रपटसृष्टीत पुरस्कार सोहळ्याबाबतची उत्सुकता शिगेला पोहचली आहे. सोहळ्याला कलाकारांचा उत्तम प्रतिसाद मिळत आहे. ‘सकाळ प्रीमियर पुरस्कार सोहळ्या’चे यंदाचे चौथे वर्ष आहे. पी. एन. जी. ज्वेलर्स लि.सोहळ्याचे मुख्य प्रायोजक आहेत.
राजकीय, सामाजिक अन् उद्योग क्षेत्रातील मान्यवर मंडळी त्यास आवर्जून उपस्थित राहणार आहेत. मनोरंजनाचा धमाकेदार कार्यक्रम आणि नृत्य-संगीताच्या सुरेल मैफिलीत सहभागी होण्याची संधीही रसिकांना मिळणार आहे.
सर्वोत्कृष्ट चित्रपट, अभिनेता व अभिनेत्री, दिग्दर्शक, सहायक अभिनेता-अभिनेत्री आदी विविध विभागांत पुरस्कार दिले जाणार आहेत. सोहळा सर्वांसाठी खुला असून त्यात रसिकांना विनामूल्य उपस्थित राहता येणार आहे. मराठी मनोरंजन वाहिनीवर त्याचे प्रक्षेपणही केले जाणार आहे.
कधी : बुधवार, १२ जून २०२४ | कुठे : डॉ. काशिनाथ घाणेकर नाट्यगृह, घोडबंदर रोड, मानपाडा, ठाणे (पश्चिम) |
केव्हा : संध्याकाळी ६ वाजता | प्रवेश विनामूल्य
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.