'ठाकरे २' चं स्क्रिप्ट ईडीवाले घेऊन गेले; संजय राऊत यांचं मोठं वक्तव्य, कारण सांगत म्हणाले- जेव्हा ते घरी आलेले...

सध्या संपूर्ण महाराष्ट्रात राज्यसभा निवडणुकीचं वारं वाहतंय. प्रत्येक उमेदवार आपल्या पक्षाचा प्रचार जोरदार करतोय. त्यात मुलाखतीही रंगताना दिसतायत. अशातच शिवसेना उद्धव बाळासाहेब ठाकरे गटाचे खासदार आणि प्रवक्ते संजय राऊत यांनी एका मुलाखतीत बाळासाहेब ठाकरे यांच्यावरील 'ठाकरे २' या चित्रपटाबद्दल भाष्य केलं. २०१९ साली आलेल्या 'ठाकरे' या चित्रपटाचा पुढील भाग म्हणजे 'ठाकरे २'. मात्र या चित्रपटाची स्क्रिप्ट ईडी वाले घेऊन गेले असं राऊत यांनी सांगितलंय.

'ठाकरे' या चित्रपटाची निर्मिती संजय राऊत यांनी केली होती. यात नवाजुद्दीन सिद्दीकी आणि अमृता राव मुख्य भूमिकेत होते. काही वर्षणापुर्वी 'ठाकरे २' या चित्रपटाच्या चर्चा होत्या. मात्र त्याचं पुढे काहीच झालं नाही. आता महाराष्ट्र टाइम्सला दिलेल्या मुलाखतीत संजय यांनी याबद्दल सांगितलं आहे. चित्रपटाबद्दल विचारणा केल्यावर राऊत म्हणाले, 'धर्मवीर २ आला आणि गेला. येक नंबर सुद्धा कधी आला कधी गेला, काही कळलंच नाही. ठाकरे २चं स्क्रिप्ट जे आहे ते तयार होतं. पण माझ्या घरावर ईडीनं धाडी घातल्या आणि ते स्क्रिप्ट सुद्धा घेऊन गेले. त्यांना असं वाटलं बॅलेन्स शीट आहेत शिवसेनेच्या. जाड असं पुस्तकासारखं होतं. वरती ठाकरे लिहिलं होतं. आमची संपत्तीच होती ती. मी त्यांना वारंवार कळवतोय, कोर्टात जातोय की माझं स्क्रिप्ट परत द्या.'

ते पुढे म्हणाले, 'त्यात ईडीनं न्यावं असं काय आहे? जवळजवळ १५० पानांचं काम जे केलं होतं ते होतं त्यात. त्यांनी माझ्या समोर उघडलं ते बघितलं. मराठीत होतं, त्यांना काही कळतंच नव्हतं ते. त्यांना फक्त मध्ये मध्ये आकडे दिसत होते. खरं म्हणजे ते आकडे बाळासाहेबांच्या तोंडी आलेले आकडे होते, जिंकलेल्या जागा कोणत्या, २८, २८, ५६... मंत्रीमंडळातल्या जागा..असे काही आकडे होते. त्यांना असं वाटलं की हिशोबाच्या वह्या आहेत का.' या मुलाखतीत जेव्हा स्क्रिप्ट परत मिळेल तेव्हा आपणच 'ठाकरे २' दिग्दर्शित करणार असल्याचं त्यांनी सांगितलं.