Yed Lagla Premach : विशाल-पूजाची 'येड लागलं प्रेमाचं' ही मालिका आहे 'या' गाजलेल्या मालिकेचा रिमेक

सध्या मराठी मालिकाविश्वात अनेक नवनवीन मालिका प्रेक्षकांच्या भेटीस येत आहे. लवकरच स्टार प्रवाह वाहिनीवर 'येड लागलं प्रेमाचं' ही नवी मालिका प्रेक्षकांच्या भेटीस येणार आहे. विशाल निकम आणि पूजा बिरारी यांची मुख्य भूमिका असलेल्या या मालिकेचा प्रोमो सध्या सोशल मीडियावर खूप गाजतोय. पण तुम्हाला माहिती आहे का? ही मालिका एका गाजलेल्या मालिकेचा रिमेक आहे ते.

पूजा आणि विशाल यांची मुख्य भूमिका असलेली ही मालिका गाजलेली तेलुगू मालिका 'गोरिंटकू' चा रिमेक आहे. २०२१ साली ही मालिका स्टार माँ या तेलुगू वाहिनीवरून प्रेक्षकांच्या भेटीस आली. त्यानंतर या मालिकेचा रिमेक 'मेहेंदी है रचनेवाली' या नावाने हिंदीमध्ये करण्यात आला. तरुणपणीच विधवा झालेली तरुणी आणि एक गुंड यांची हटके गोष्ट या मालिकेत दाखवण्यात आली होती आणि आता ही गोष्ट मराठीत पाहायला मिळणार आहे.

पहा प्रोमो:

राया नावाचा गावगुंड आणि खंबीर मंजिरी यांची वेगळी गोष्ट या मालिकेतून प्रेक्षकांच्या भेटीस येणार आहे. गावगुंड असलेल्या रायाची मंजिरी तक्रार करते आणि मंजिरीला घरी पाहुणे बघायला आलेले असतानाच राया त्यांच्या घरी येऊन तमाशा करतो असं या प्रोमोमध्ये दाखवण्यात आलं आहे. मालिकेचा हा प्रोमो सध्या सोशल मीडियावर चर्चेत आहे.

पण ही मालिका प्रेक्षकांच्या भेटीस कधी येणार हे अजून स्टार प्रवाह वाहिनीने स्पष्ट केलं नाहीये. स्वाभिमान या मालिकेनंतर पूजा बऱ्याच काळाने नवीन मालिकेतून प्रेक्षकांच्या भेटीस येतेय तर विशाल निकमसुद्धा बिग बॉस सीजन ३ नंतर बऱ्याच काळाने मालिकाविश्वात कमबॅक करतोय. त्याच्या मालिकेतील लूकने सगळ्यांचं लक्ष वेधून घेतलं आहे. यासोबतच विशाल 'वेडात मराठे वीर दौडले सात' या महेश मांजरेकर दिग्दर्शित सिनेमातही दिसणार आहे. हा सिनेमाही लवकरच प्रेक्षकांच्या भेटीस येणार असून या सिनेमात अभिनेता अक्षय कुमार छत्रपती शिवाजी महाराजांची भूमिका साकारणार आहे तर प्रवीण तरडे सरसेनापती प्रतापराव गुजर यांच्या भूमिकेत दिसणार आहेत.