Commercial LPG Cylinder Rationing
esakal
कृष्ण जोशी - sarkarnama@esakal.com
अमेरिका-इराण युद्ध संपण्याची कोणतीही चिन्हे दिसत नसल्याने त्याचा एक वेगळाच फटका देशातील हॉटेल-रेस्टॉरंट आणि त्यांच्यावर पोट अवलंबून असलेल्या श्रमिकांना बसत आहे. आखाती देशातून होणारा नैसर्गिक वायूचा पुरवठा विस्कळीत झाल्यामुळे हॉटेलचालकांना अभूतपूर्व अशी तारेवरची कसरत करावी लागत आहे. व्यावसायिक सिलिंडर ग्राहकांसाठी मर्यादित कोटा देण्याचे सरकारने जाहीर केले आहे व गॅस एजन्सी त्यानुसार तसे रेशनिंग करत आहेत. अशा स्थितीत काही ठिकाणी हॉटेलचालकांना जास्त रक्कम देऊन काळ्या बाजारात सिलिंडर घ्यावे लागत आहेत. अनेक लहानमोठ्या हॉटेलचालकांनी आपल्या मेनूमध्ये कपात केली आहे. ग्राहक कमी झाल्यामुळे काही ठिकाणी काही कर्मचारीदेखील अतिरिक्त ठरले आहेत. मात्र त्यांना काढूनही टाकता येत नाही. त्यामुळे ‘धरले तर चावते आणि सोडले तर पळते’ अशी हॉटेल चालकांची अवस्था झाली आहे. काही हॉटेल चालकांनी किंचित दरवाढही केली आहे. असे करून अनेक हॉटेलचालक कसेतरी परिस्थितीला तोंड देत आहेत. मात्र आणखी दोन-तीन आठवडे अशीच परिस्थिती कायम राहिल्यास आणखी बिकट परिस्थिती उद्भावेल, असे हॉटेल व्यवसायिकांचे म्हणणे आहे.
