Cesar Chavez meeting
sakal
वेठबिगारमुक्ती, पुनर्वसन, सिद्धपीठाचा लढा आणि अशा अनेक प्रश्नांच्या सोडवणुकीत, त्यासाठीच्या संघर्षात मी इतका गुंतून गेलो होतो, की दुसऱ्या देशात जाऊन वंचितांच्या प्रश्नांच्या सोडवणुकीचं तंत्र अभ्यासावं, असा विचारही कधी मनात आला नाही. समोर प्रश्न आला, एखाद्यावर अन्याय दिसला, कायद्याच्या अंमलबजावणीचे तीनतेरा वाजलेले निदर्शनास आले, परमपवित्र संविधान पायदळी तुडवताना कुठे दिसलं, स्वातंत्र्यवीरांनी पाहिलेल्या स्वप्नांची राख होताना दिसली की, तेवढी ठिणगी हृदयात अग्नी प्रज्वलित करायला मला पुरेशी ठरायची.