किशोर पेटकर‘‘खरोखरच हा माझ्यासाठी खूप अभिमानाचा क्षण आहे. ऑलिंपिक स्पर्धेला काही महिने बाकी असताना अव्वल २५ मध्ये स्थान मिळवल्यामुळे आणि कारकिर्दीतील सर्वोत्तम मानांकन गाठल्यामुळे तयारीला चांगली चालना मिळेल.’’ .भारताची टेबल टेनिसपटू मनिका बत्राने तिच्या कारकिर्दीत नवीन शिखर गाठले आहे. आंतरराष्ट्रीय टेबल टेनिस महासंघाने जाहीर केलेल्या मे २०२४मधील जागतिक क्रमवारीत मनिका बत्राने साधलेली प्रगती कौतुकास्पद आहे. जगातील पहिल्या २५ महिला खेळाडूंत स्थान मिळविणारी मनिका पहिली भारतीय महिला टेबल टेनिसपटू ठरली. आगामी पॅरिस ऑलिंपिकच्या पार्श्वभूमीवर दिल्लीच्या या खेळाडूचा उंचावलेला स्तर निश्चितच आश्वासक आहे. डब्ल्यूटीटी ग्रँड स्मॅश मालिकेतील जेद्दाह येथे झालेल्या सौदी स्मॅश स्पर्धेतील चमकदार खेळी मनिकाला क्रमवारीत मोठी झेप घेण्यास साह्यभूत ठरली. या २८ वर्षीय खेळाडूने जेद्दाह येथील स्पर्धेत जागतिक क्रमवारीतील द्वितीय मानांकित चीनची ऑलिंपिक पदक विजेती वँग मॅन्यू हिला पराभूत केले. नंतर जर्मनीची १४व्या क्रमांकावरील निना मिट्टेलहॅम हिला नमवून आगेकूच राखली..पुढे उपांत्यपूर्व लढतीत मनिका पराभूत झाली, मात्र या शानदार खेळामुळे तिला ३९व्या क्रमांकावरून चक्क २४व्या क्रमांकावर झेप घेणे शक्य झाले. टॉप २५ खेळाडूंत येणारी ती एकंदरीत दुसरी भारतीय टेबल टेनिसपटू आहे. २०१९मध्ये भारताच्या साथियन ज्ञानशेखरन याने पुरुष एकेरीत २४वा क्रमांक पटकावला होता, त्या कामगिरीशी आता मनिकाने बरोबरी साधली. एकूण १५ क्रमांक वर चढलेल्या मनिकाची ही एकेरीतील वैयक्तिक सर्वोत्तम कामगिरी आहे. गतवर्षी तिने ३३व्या क्रमांकापर्यंत भरारी घेतली होती. ती पुन्हा एकदा भारतातील अव्वल महिला टेबल टेनिसपटू ठरली आहे. काही महिन्यांपूर्वी श्रीजा अकुला हिने मनिकाला दुसऱ्या क्रमांकावर ढकलले होते. ताज्या मानांकनात श्रीजा ३८वरून ४१व्या स्थानी गेली आहे..तिसऱ्या ऑलिंपिकचे वेधमनिका बत्रा २०१६मध्ये झालेल्या रिओ ऑलिंपिकसाठी सर्वप्रथम पात्र ठरली होती, परंतु तेव्हा महिला एकेरीत पहिल्याच फेरीत गारद झाली. २०२०च्या (२०२१मध्ये झालेल्या) टोकियो ऑलिंपिकमध्ये तिने तिसऱ्या फेरीपर्यंत मजल मारली होती. आता या प्रतिभावान खेळाडूस तिसऱ्या ऑलिंपिकचे वेध लागले आहेत. जागतिक क्रमवारीतील स्थान उंचावलेले असल्यामुळे साहजिकच तिचा आत्मविश्वासही बळावला आहे, हे तिच्या प्रतिक्रियेवरून जाणवते. माध्यमांशी बोलताना ती म्हणाली, ‘‘खरोखरच हा माझ्यासाठी खूप अभिमानाचा क्षण आहे. ऑलिंपिक स्पर्धेला काही महिने बाकी असताना अव्वल २५मध्ये स्थान मिळवल्यामुळे आणि कारकिर्दीतील सर्वोत्तम मानांकन गाठल्यामुळे तयारीला चांगली चालना मिळेल.’’‘खेलरत्न’ टेबल टेनिसपटूदेशातील सर्वोच्च क्रीडा पुरस्कार असलेल्या ‘खेलरत्न’ची मनिका बत्रा २०२०मध्ये मानकरी ठरली. त्यापूर्वी २०१८मध्ये ती ‘अर्जुन’ पुरस्काराने सन्मानित झाली. मनिकाने २०१८ साली अफलातून यश प्राप्त केले होते..त्यावर्षी जकार्ता-पालेमबांग येथे झालेल्या आशियाई क्रीडा स्पर्धेत मिश्र दुहेरीतील ब्राँझपदक जिंकल्यानंतर ऑस्ट्रेलियातील गोल्ड कोस्ट येथे झालेल्या राष्ट्रकुल क्रीडा स्पर्धेत तिने दोन सुवर्ण, एक रौप्य व एक ब्राँझ अशी एकूण चार पदके जिंकली. राष्ट्रकुल स्पर्धेत महिला एकेरीत सुवर्णपदक जिंकणारी ती पहिली भारतीय ठरली.(किशोर पेटकर सकाळ माध्यम समूहाच्या दै. गोमन्तकचे क्रीडा वार्ताहर आहेत.)---------------------------------------------------------------.Career In styling and Make-up: व्यक्तिमत्त्व फुलवण्याचे कौशल्यतंत्र आत्मसाद केल्यास करियरच्या चांगल्या संधी .सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
