लग्नसराईच्या दिवसात एक ग्रॅम सोन्याला आलीये चांगलीच झळाळी..! पण एक ग्रॅम सोनं वापरून ज्वेलरी कशी तयार केली जाते?

राधिका परांजपे-खाडिलकरदागिने विश्वाला, आणि पर्यायाने प्रत्येक दागिनेवेड्या स्त्रीला मिळालेलं एक गिफ्ट म्हणजे - एक ग्रॅम सोन्याचे दागिने! एक ग्रॅम दागिने आपल्या बजेटमध्ये मिळतात, त्यामुळे प्रत्येक नव्या सणाला एखादा नवा दागिना घेतला तरी फार दडपण येत नाही! .कधीकधी वाटतं खूप उशिरा जन्माला आले. पूर्वीच्या काळातले दागिन्यांनी मढलेल्या राण्यांचे फोटो बघितल्यावर वाटतं, आपला जन्माला येण्याचा कालखंड जरा चुकलाच. राण्या-महाराण्यांच्या काळामध्ये जन्माला आले असते, तर दागिन्यांनी सजून बसण्यासाठी सणावाराचं निमित्त शोधावं लागलं नसतं. काहीही न करता रोजच्या रोज नटून बसण्याचं सुख फक्त इमॅजिनेशनपुरतं सीमित राहिलं नसतं. बरं, नटण्यामुरडण्यासाठी निमित्त शोधलं, तरी दरवेळी नवनवीन दागिने घ्यायचे कसे? आधीच्या खरेदीमुळे खिशाला पडलेली मोठ्ठाली छिद्रं बुजतात न बुजतात, तोपर्यंत नवीन दागिने घ्यायची इच्छा बळावू पाहत असते. जरा कुठे मनाला आवर घालण्याचा प्रयत्न केला, की संजय लीला भन्साळींच्या चित्रपटातील नव्या ट्रेंडचे दागिने परिधान केलेल्या रूपगर्विता त्यांच्या पोस्टरमधूनसुद्धा टोमणे मारताहेत असा भास होतो. हं, म्हणजे त्या नायिकांसारखं रूपडं नसलं म्हणून काय झालं? किमान तसे दागिने तर मिळताहेत, हा दिलासा असतो. अगदी ‘कस्टम मेड फॉर भन्साळी’ कलेक्शन नाही मिळालं तरी त्या डिझाईन्सच्या जवळपास जाणाऱ्या कलेक्शनमध्ये समाधान मानण्यात काही हरकत नाहीये आमची! पण फिरून फिरून परत प्रश्न येतो, तो खिशाला पडणाऱ्या छिद्राचा! यावर तोडगा कसा काढायचा याचं निष्फळ विचारमंथन करणाऱ्या आमच्यासारख्या मुलींची हाक जणू सुवर्ण व्यावसायिकांनी ऐकली असावी. .काही वर्षांपूर्वीच दागिने विश्वाला, आणि पर्यायाने आम्हा दागिनेवेड्या मुलींना एक गिफ्ट मिळालं. एक ग्रॅम सोन्याचे दागिने! सोन्याच्या ज्वेलरीला असा काही पर्याय असू शकतो हे गावीही नसणाऱ्या आम्हा मुलींना आश्चर्याचा धक्का बसला. अर्थात एक ग्रॅम सोन्यापासून विविध दागिने तयार करणं ही संकल्पना नवी नसली, तरी हे दागिने ट्रेंडमध्ये मात्र अगदी अलीकडच्या काळात आले आहेत.एक ग्रॅमचे दागिने बाजारात आले तेव्हा सुरुवातीला अनेकजणींप्रमाणे माझाही भोळाभाबडा गैरसमज झाला, की एक ग्रॅम सोनं वापरून ही ज्वेलरी तयार केली जाते. एवढ्याशा सोन्यापासून मोठ्या डिझाईनचे दागिने कसे तयार होत असतील असा प्रश्न पडला. हळूहळू समजलं, की हा दागिना तयार करताना वापरला जाणारा मूळ धातू वेगळा असतो. त्यावर सोन्याचं पाणी दिलं जातं. त्यामुळे या दागिन्यांना एक छान, नजर सुखावणारी झळाळी येते.तसं बघायला गेलं, तर एक ग्रॅम दागिने ट्रेंड व्हायच्या आधीही दागिन्यांचं विश्व इमिटेशन ज्वेलरीच्या पर्यायानं ओतप्रोत भरलेलं होतंच, पण इमिटेशन ज्वेलरीला सोन्यासारखी पिवळीधम्मक झळाळी येणं अशक्यच होतं! त्यामुळे एक ग्रॅम ज्वेलरीचा ट्रेंड येताक्षणी लोकप्रिय ठरला. बऱ्याचजणांची अजूनही इमिटेशन ज्वेलरी आणि एक ग्रॅम ज्वेलरीमध्ये गल्लत होते. तसं वरवर बघितलं, तर दोन्ही प्रकारांमध्ये फरक आहे, हे लक्षात येत नाही. पण जराशा निरीक्षणातून हा फरक ओळखता येऊ शकतो. एक ग्रॅम ज्वेलरीमध्ये दागिन्यांवर जसा सोन्याच्या पाण्याचा थर चढवला जातो तसा इमिटेशन ज्वेलरीमध्ये साधाच पिवळ्या रंगाचा थर चढवला जातो. हाच या दोन प्रकारांमधला मुख्य फरक. यामुळेच दोन दागिन्यांच्या झळाळीत फरक जाणवतो. इमिटेशन ज्वेलरीवर चढवलेला थर उतरायला वेळ लागत नाही. इमिटेशन दागिन्यांना सातत्याने पाणी लागल्यामुळे हा थर उतरतो आणि आतल्या धातूचा रंग दिसू लागतो. त्यामुळे संपूर्ण दागिनाच टाकून द्यायची वेळ येते. पण एक ग्रॅम ज्वेलरीमध्ये ही समस्या उद्भवत नाही. सोन्याच्या झळाळीचा रंग उतरत नाही. त्यामुळे तुम्ही कंटाळा येईपर्यंत हे दागिने वापरू शकता. अगदीच गरज पडली तर पॉलिशही करून घेऊ शकता. .गेल्या काही वर्षांमध्ये एक ग्रॅम ज्वेलरीच्या कलेक्शन्समध्ये बराच फरक पडलेला जाणवतो. सुरुवातीला या दागिन्यांच्या डिझाईन्समध्ये फारसे प्रयोग केले जात नव्हते. नाजूक, रोजच्या वापरात सोयीचे पडतील असे दागिने सुरुवातीला बाजारात बघायला मिळाले. मात्र मोठ्या ब्रॅण्ड्सनी या दागिन्यांचं स्वरूपच बदललं. टेम्पल फिनिश, मॅट फिनिश, ऑक्सिडाईज्ड अशा वेगवेगळ्या प्रकारांमध्ये दागिने तयार होऊ लागले. आजघडीला तुम्ही म्हणाल ते कलेक्शन एक ग्रॅममध्ये उपलब्ध असतं. मोहनमाळ, कोल्हापुरी साज, ठुशी, लक्ष्मीहार, पोहेहार अशा पारंपरिक दागिन्यांपासून अनेक अभिनेत्रींनी चित्रपटांत परिधान केलेल्या ज्वेलरीच्या कलेक्शनपर्यंत प्रत्येक प्रकारचा दागिना एक ग्रॅममध्ये मिळू शकतो. रोझ गोल्ड या प्रकारातही आता वेगवेगळी डिझाईन्स बघायला मिळतात.या एक ग्रॅम ज्वेलरीचा मला सगळ्यात भावलेला फायदा म्हणजे या दागिन्यांची किंमत! एक ग्रॅम ज्वेलरीची कमी किंमत हा या दागिन्यांचा यूएसपी म्हणजेच युनिक सेलिंग पॉइंट आहे, असं मला मनापासून वाटतं. जुजबी किंमत आणि सोन्यासारखी झळाळी हे माझा दृष्टीने अफलातून कॉम्बिनेशन आहे! सोन्याच्या दागिन्यांच्या किमती खिसेफाडू असल्या, तर एक ग्रॅम दागिन्यांच्या किमती म्हणजे खिशाला केलेलं रफू आहे असं म्हटलं तर जरा रुड वाटेल, पण ती अतिशयोक्ती ठरणार नाही! एक ग्रॅम दागिने आपल्या बजेटमध्ये मिळतात, त्यामुळे अगदी प्रत्येक नव्या साडीवर, हरएक सणाला जरी एखादा नवा दागिना घेतला तरी फार दडपण येत नाही! तसंच एखाद्या मैत्रिणीला किंवा बहिणीला गिफ्ट करण्यासाठीसुद्धा हा पर्याय उत्तम ठरतो. .एक ग्रॅम ज्वेलरीमध्ये मिळणारी व्हारायटी आणि परवडणाऱ्या किमतीचा फायदा अनेकींना ब्रायडल ज्वेलरी ठरवताना होतो. लग्नात प्रत्येक लुकला सूट होईल अशी ज्वेलरी शोधणं ही एक अत्यंत वेळखाऊ प्रक्रिया असते. त्यात खर्चाचं गणितही बसवायचं असतं. पण आता एक ग्रॅमच्या ज्वेलरीमुळे काम बरंच सोपं झालंय. त्यामुळे सध्या खूपजणी लग्नातही एक ग्रॅम ज्वेलरीचा आधार घेताना दिसतात. या ज्वेलरीची किंमत सोन्याच्या दागिन्यांच्या तुलनेने फारच कमी असल्यामुळे लग्नात वेगवेगळ्या लुक्सवर वेगळी, हटके ज्वेलरी परिधान करण्याची संधी मिळते. त्यामुळे लुक्स फ्रेश दिसतात. त्यामुळेच हल्ली एक ग्रॅममध्ये तयार झालेली खास ब्रायडल कलेक्शन्स लक्ष वेधून घेतात. सोनं, मोती, डायमंड अशी वेगवेगळी कलेक्शन चर्चेचा विषय ठरतात. लग्नसराई जवळ आल्यानंतर या दुकानांमध्ये ही भलीमोठी गर्दी बघायला मिळते.एक ग्रॅमच्या ज्वेलरीला मिळालेली लोकप्रियता बघता हा ट्रेंड पुढची अनेक वर्षं साथसंगत करणार असं दिसतंय. या ज्वेलरीमुळे एक गोष्ट मात्र फारच चांगली झाली. दागिन्यांचीही मनसोक्त खरेदी करता येऊ लागली. महत्त्वाचं म्हणजे, अखंड सुरू असलेल्या ज्वेलरी खरेदीमुळे वैतागलेल्या आईलाही हे दागिने आवडू लागले आणि माझ्यासारखंच तिच्याही बजेटचा प्रश्न सुटल्याने तिचाही खिसा, किंवा पर्स म्हणा हवं तर, सुखावली...!----------------.Saptahik Sakal : साप्ताहिक सकाळ नव्या वळणावर....सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.

लग्नसराईच्या दिवसात एक ग्रॅम सोन्याला आलीये चांगलीच झळाळी..! पण एक ग्रॅम सोनं वापरून ज्वेलरी कशी तयार केली जाते?

Related Stories

शिरपूर : गुन्हेगार पत्नीसह जेरबंद

Gold Rate Today: सणाआधी सोन्याच्या भावात मोठा बदल! खरेदीआधी पाहा तुमच्या शहरातील 10 ग्रॅमचा ताजा भाव

Gold Rate Today: सोनं स्वस्त होण्याची वाट पाहणाऱ्यांना मोठा धक्का! तब्बल ₹15 हजारांनी महागलं; आता 10 ग्रॅम सोनं कितीला?