Local body elections Maharashtra
esakal
राज्यातील नगर परिषद, नगरपंचायतीच्या २६४ जागांसाठी २ डिसेंबरला मतदान पार पडले आहे. २० डिसेंबरला उर्वरित २४ नगरपरिषदा व नगरपंचायतीच्या अध्यक्षपदांसह सर्व सदस्यपदांसाठी आणि ७६ नगरपरिषदा व नगरपंचायतीच्या १५४ सदस्यपदांच्या जागांसाठी मतदान होणार आहे. दोन टप्प्यात पार पडलेल्या निवडणुकांची मतमोजणी २१ डिसेंबर रोजी होणार आहे. स्थानिक स्वराज्य संस्थांच्या निवडणुकांमध्ये यापूर्वी कदाचित एवढे नाट्य नसेल, जेवढे यावेळच्या निवडणुकांत पाहता आले. प्रचारादरम्यान एकीकडे सत्ताधाऱ्यांमधील बेबनाव, पैशांची आमिषे, निधीवाटपातील राजकीय हस्तक्षेपावर कोणताही विधिनिषेध न बाळगता जाहीर चर्चा झाल्याचे दिसले. या निवडणुकीत मंत्री, खासदार, आमदारांचे जवळचे नातलग निवडणुकीच्या रिंगणात उतरले, विरोधी पक्षांचे उमेदवार पळवले, महायुतीच्या घटक पक्षांचे महाविकास आघाडीतील घटक पक्षांसोबत आघाडी झाली, उमेदवारी अर्ज जबरदस्ती मागे घ्यायला लावल्याचे आरोप झाले, अर्ज मागे घेण्याचा दबाव टाळण्यासाठी उमेदवार दुसऱ्या शहरांमध्ये लपून राहिले, उमेदवारांना मटण-दारू पार्टीच्या पुढे जाऊन मताला १० हजारांपासून २५ हजारांपर्यंत वाटले गेल्याचे आरोप झाले. हे नाट्य कमी की काय म्हणून मतदानाच्या ७२ तासांपूर्वी काही जागांवरच्या निवडणुका स्थगित झाल्या, त्यांच्यासाठी २० डिसेंबर रोजी मतदान पार पडते आहे.