जागतिक किमान काॅर्पोरेट टॅक्सचा दर ठरविण्यामागे नेमकी भानगड आहे तरी काय...
बहुराष्ट्रीय कंपन्यांना सहसा काॅर्पोरेट टॅक्स पूर्ण भरण्याची इच्छा नसते.. म्हणजे तसा सार्वत्रिक अनुभव असल्याचे म्हटले जाते.. त्यामुळे करविषयक कोणतेहे ओझे टाळण्यासाठी किंवा कमी करण्यासाठी या कंपन्या कोणत्याही प्रकारचा मार्ग शोधत असतात. अनेक कंपन्या केवळ या कारणासाठी आयर्लँड किंवा केमॅन आयलंड यासारख्या देशांमध्ये आपले कार्यलय थाटतात. हे सर्व कशासाठी तर कर म्हणजे टॅक्स स्वरुपात कोट्यवधी डाॅलर भरावे लागू नये यासाठी.
अमेरिकन सरकार मात्र आता अशा कंपन्यांना धडा शिकविण्यासाठी प्रयत्न करत आहे. काही देश हे केवळ अशा बड्या उद्योग वा कंपन्यांना आकर्षित करण्यासाठी काॅर्पोरेट टॅक्सचा दर कमी ठेवतात आणि या कंपन्यांसाठी व्यवसाय-पूरक वातावरण निर्माण करतात. साहजिकच आहे, मूळ बहुराष्ट्रीय कंपन्यांनी (होल्डिंग किंवा पालक कंपन्यांनी) अशा देशांमध्ये सबसिडायरी कंपनी (पालक कंपनीच्या नियंत्रणाखाली असलेली कंपनी) स्थापन करून तसेच आपले मुख्यालयच या देशांमध्ये हलविल्यामुळे अमेरिकेला (संभाव्य) कर उत्पन्नाच्या दृष्टीने मोठे नुकसान सहन करावे लागत आहे.
