पुणे जिल्ह्यात मंगळवारी दिवसभरात १७७ नवे कोरोना रुग्ण

पुणे - पुणे जिल्ह्यात मंगळवारी (ता.१४) दिवसभरात १७७ नवे कोरोना रुग्ण आढळून आले आहेत. जिल्ह्यातील दिवसातील एकूण कोरोना रुग्णांमध्ये पुणे शहरातील ७१ रुग्ण आहेत. जिल्ह्यातील तीन जणांचा दिवसभरात कोरोनाने मृत्यू झाला आहे. पुणे शहरात दिवसभरात कोरोनाने एकही मृत्यू झाला नाही. एकूण मृत्यूमध्ये पिंपरी चिंचवडमधील एक आणि जिल्हा परिषद कार्यक्षेत्रातील दोन मृत्यू आहेत.

दिवसभरात पिंपरी चिंचवडमध्ये ४४, जिल्हा परिषद कार्यक्षेत्रात ५०, नगरपालिका हद्दीत ११ आणि कॅंटोन्मेंट बोर्ड क्षेत्रात एक नवीन कोरोना रुग्ण आढळून आले आहेत. याउलट दिवसात जिल्ह्यातील १९२ जण कोरोनामुक्त झाले आहेत. एकूण कोरोनामुक्तांमध्ये पुणे शहरातील सर्वाधिक ९० जण आहेत. पिंपरी चिंचवडमधील ४०, जिल्हा परिषद कार्यक्षेत्रातील ४९, नगरपालिका हद्दीतील नऊ आणि कॅंटोन्मेंट बोर्ड क्षेत्रातील चार जण कोरोनामुक्त झाले आहेत.

सद्यःस्थितीत पुणे जिल्ह्यात एकूण १ हजार ६४७ सक्रिय कोरोना रुग्ण शिल्लक राहिले आहेत. एकूण सक्रिय रुग्णांपैकी शहर व जिल्ह्यातील विविध रुग्णालयात मिळून ५७६ रुग्णांवर उपचार सुरु आहेत. उर्वरित १ हजार ७१ जण गृह विलगीकरणात आहेत. पुणे शहरात आता ७३९ सक्रिय कोरोना रुग्ण आहेत. यापैकी २८९ रुग्णांवर विविध रुग्णालयांत उपचार सुरु असून, उर्वरित ४५० जण गृह विलगीकरणात आहेत.