Swargate Bus Crime : दत्तात्रय गाडे विरोधात लैंगिक अत्याचारप्रकरणी ८९३ पानांचे आरोपपत्र न्यायालयात दाखल

पुणे - स्वारगेट एसटी स्थानकात शिवशाही बसमध्ये तरुणीवर झालेल्या लैंगिक अत्याचार प्रकरणातील आरोपीविरुद्ध पुणे पोलिसांच्या गुन्हे शाखेने गुरुवारी प्रथमवर्ग न्यायदंडाधिकारी व्ही. ए. मकानदार यांच्या न्यायालयात आरोपपत्र दाखल केले. गुन्हा घडल्यानंतर ५२ दिवसातच आरोपीविरुद्ध ८९३ पानांचे आरोपपत्र दाखल करण्यात आले आहे.

दत्तात्रय रामदास गाडे (वय ३७, रा. गुनाट, शिरूर) असे आरोपीचे नाव आहे. स्वारगेट एसटी स्थानकात २५ फेब्रुवारी रोजी पहाटे साडे पाच वाजण्याच्या सुमारास गाडे याने तरुणीवर लैंगिक अत्याचार केले होते. याप्रकरणी आरोपीविरुद्ध भारतीय न्याय संहितेतील कलम ६४ (बलात्कारासाठी शिक्षा), ६४ (२) (एम) वारंवार बलात्कार. ३५१ (२) (धमकावणे), ११५ (२) (जाणीवपूर्वक दुखापत पोहोचविणे) व १२७ (२) (डांबून ठेवणे) या कलमांनुसार स्वारगेट पोलिस ठाण्यात गुन्हा दाखल करण्यात आला होता. संबंधित घटनेनंतर सामाजिक, राजकीय स्तरातून मोठ्या प्रमाणात निषेध नोंदविण्यात आला होता, संबंधित प्रकरणाची राज्यभर चर्चा झाली होती.

घटनेचे गांभीर्य ओळखून पोलिस आयुक्त अमितेश कुमार यांनी संबंधित प्रकरणाचा तपास गुन्हे शाखेकडे वर्ग केला होता. गाडे याने गुन्हा केल्यानंतर तो त्याच्या शिरूर येथील गुनाट या गावामध्ये लपून बसला होता. पुणे पोलिसांनी ग्रामस्थांच्या मदतीने तीन ड्रोन कॅमेरे, श्वान पथकांच्या मदतीने आरोपी गाडे यास बेड्या ठोकल्या होत्या.

न्यायालयाने आरोपीला १२ दिवस पोलिस कोठडी सुनावली होती. त्यानंतर न्यायालयाच्या आदेशानुसार गाडे याची येरवडा कारागृहात न्यायालयीन कोठडीत रवानगी केली होती. तपास अधिकारी शैलेश संखे यांच्या पथकाने आरोपी गाडेविरोधात भौतिक, जैविक, वैद्यकीय, तांत्रिक, परिस्थितीजन्य, शास्त्रीय पुरावे गोळा केले, त्यानंतर सरकारी वकील भाग्यश्री डागळे-संचेती यांच्यामार्फत ८९३ पानांचे आरोपपत्र दाखल करण्यात आले आहे.

या प्रकरणात ८२ साक्षीदार तपासण्यात आले असून न्यायालयात पाच साक्षीदारांचे जबाब नोंदविण्यात आले आहेत. एकूण बारा पंचनामे करण्यात आले आहेत, त्यामध्ये गुगल सर्च, तुलनात्मक ध्वनी तीव्रता पडताळणी, ओळख परेड, सीसीटीव्ही आणि निवेदन या पाच महत्वाच्या पंचनाम्यातून आरोपीविरुद्ध पुरावे सादर करण्यात आले आहेत.