Pune Accident News : ट्रक व बुलेटच्या धडकेत तरुणाचा जागीच मृत्यु

वाघोली : लोणीकंद थेऊर रोड वर मगर वस्ती परिसरात ट्रकची धडक बसल्याने बुलेट वरील तरुणाचा मृत्यू झाल्याची घटना घडली. या प्रकरणी ट्रक चालकावर गुन्हा दाखल करण्यात आला आहे. तीन दिवसात तीन अपघातात पाच जणांचा बळी गेला. यातील दोन अपघात लोणीकंद थेऊर या अष्टविनायक रोड वर घडले.

  रोहित काळुराम वारघडे (वय २५ वर्षे, रा बकोरी) असे अपघातात मृत्यूमुखी पडलेल्या तरुणाचे नाव आहे. या प्रकरणी दत्तात्रय आनंदा वारघडे यांनी फिर्याद दिली. ट्रक चालक रंगनाथ रावसाहेब शिरसाट ( वय ४९, रा बीड ) याच्यावर गुन्हा दाखल करण्यात आला आहे. पोलीसांनी दिलेल्या माहितीनुसार, रोहित हा वाघोली येथून बकोरी कडे बुलेट वर जात होता. ट्रकचा बुलेटला धक्का लागल्याने बुलेट घसरून रोहित हा

ट्रकच्या चाकाखाली आला. त्यात त्याचा जागीच मृत्यू झाला. ही घटना ३० एप्रिल रोजी सायंकाळी साडेसात वाजण्याच्या सुमारास घडली. याच रोड वर २८ एप्रिलला सायंकाळी सात वाजण्याच्या सुमारास इको कार व कंटेनर यांची समोरासमोर धडक होवून गणेश जाधव, विनोद भोजणे व विठ्ठल जोगदंड, या तीन जणांचा मृत्यू झाला.

तर २९ एप्रिल रोजी पुणे नगर महामार्गावर हॉटेल कावेरी समोर लोखंडी सळ्या घेवून थांबलेल्या ट्रकला कारची पाठीमागून धडक बसल्याने कार चालक तरुण विजय अभिमन्यू तांदळे याचा मृत्यू झाला. हा अपघात पहाटे ५.३० वाजण्याच्या सुमारास घडला. अनेक वाहने वाहतूक नियमांचे दुर्लक्ष करून वाहतूक करतात. त्यांचा वेग अती असतो. अनेक वाहने जुनी आहेत. मात्र बेदारकपणे ते वाहतूक करतात. यामुळेच अपघात होवून बळी जातात. मात्र त्याची जाण संबंधित सरकारी यंत्रणेला अजीबात नाही. असा नागरिकांचा आरोप आहे.