खोरला वाळूमाफिया विरोधात कारवाई; 1 कोटींचा मुद्देमाल जप्त 

राहू : खोर नजीक डोंबेवाडी (ता. दौंड) येथे यवत पोलिस व महसूल विभागाच्या पथकाने संयुक्त कारवाई करत  वाळू माफियांविरोधात 1 कोटी 8 लाख रुपये किंमतीची मुद्देमालासह वाहने जप्त केली असून, संतोष दिलीप डोंबे, दत्तात्रेय अण्णा डोंबे, सोमनाथ रघुनाथ डोंबे, विशाल किसन पिसे, सागर अनंता डोंबे, गणेश दत्तात्रय डोंबे रा. सर्व जण खोर नजीक डोंबेवाडी (ता. दौंड) या सहा जणांविरोधात यवत पोलिस ठाण्यात गुन्हा दाखल करण्यात आला आहे. अशी माहिती पोलीस निरीक्षक भाऊसाहेब पाटील यांनी दिली.

हेही वाचा : बारामतीत एकाने सुरू केले `शोले` स्टाईल आंदोलन सुरू 

गुरुवारी पोलिसांनी छापा टाकत बेकायदेशीर वाळू उपसा करणारे तीन जेसीबी मशीन,  सहा ट्रॅकटर जप्त केले आहेत. तर सहा वाळू उपसा करणाऱ्या वाळूमाफिया विरोधात गुन्हे दाखल केले आहेत. खोर हद्दीतील डोंबेवाडी परिसरात मोठ्या प्रमाणात वाळू उपसा सुरू असल्याची माहिती पोलिसांना मिळताच पोलीस निरीक्षक भाऊसाहेब पाटील यांनी महसूलच्या काही कर्मचारी वर्गाला बरोबर घेत या ठिकाणी छापा टाकला असता तीन जेसीबी व सहा ट्रकटर जप्त करून ताब्यात घेतले.

या प्रकरणी खोर मधील 6 जणांच्या वर तसेच अज्ञात वाहनचालकांच्या वर पर्यावरण कायद्याअंतर्गत  गुन्हा दाखल करण्यात करण्यात आला आहे. याबाबत वरवंडचे मंडलाधिकारी महेश गायकवाड यांनी यवत पोलिसांत फिर्याद दिली आहे .खोर सारख्या जिरायती भागात एवढी मोठी कारवाई झाल्याने वाळू माफियांचे दाबे दणाणले आहेत.

हेही वाचा  : पुण्यात आणखी एका ठिकाणी आग; 500 रहिवाशांना सुखरुप बाहेर काढलं

या कारवाईमध्ये सहायक फौजदर नंदकुमार लोणकर, पोलीस हवालदार  खाडे, रणजित निकम, हेमंत कुंजीर, सुजित जगताप, किरण तुपे, संपत खबाले, अजित काळे, संतोष पंडित आणि महसूलचे पथकांनी कारवाई केली. या घटनेचा अधिक तपास पोलीस निरीक्षक भाऊसाहेब पाटील यांच्या मार्गदर्शनाखाली सहायक पोलीस निरीक्षक धनंजय कापरे करत आहेत.

(संपादन : सागर डी. शेलार)