नांदेड, किरकटवाडी, खडकवासला परिसरात विनाकारण फिरणाऱ्यांवर कारवाई अन्...

किरकटवाडी (पुणे) : सिंहगड रोड परिसरातील नांदेड, किरकटवाडी, खडकवासला, खानापूर यांसह इतरही गावांमध्ये दिवसेंदिवस वाढत असलेली कोरोना रुग्ण संख्या नियंत्रणात आणण्यासाठी जारी करण्यात आलेल्या लॉकडाउनच्या आदेशाची अंमलबजावणी करण्यासाठी मोठ्या प्रमाणात पोलिस बंदोबस्त तैनात करण्यात आलेला आहे. प्रत्येक गावामध्ये चेक पोस्ट तयार करण्यात आल्या असून येणाऱ्या जाणाऱ्या वाहनांची तपासणी केली जात आहे व विनाकारण फिरताना आढळल्यास गुन्हे दाखल करण्यात येत आहेत.
     

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

नांदेड, किरकटवाडी, खडकवासला, खानापूर या गावांमध्ये वाढत असलेली कोरोना रुग्णसंख्या नागरिकांसह प्रशासनाच्याही चिंतेत भर घालणारी आहे. त्यातच गोऱ्हे खुर्द, गोऱ्हे बुद्रुक, डोणजे, मालखेड व वरदाडे या गावांमध्येही रुग्ण आढळू लागल्याने अधिकच चिंता वाढली आहे. सध्या हवेली पोलिस स्टेशनच्या हद्दीतील एकूण रुग्ण संख्येचा आकडा 170 च्या पुढे गेला आहे. जिल्हाधिकारी नवल किशोर राम यांनी जारी केलेल्या लॉकडाउनच्या आदेशामध्ये नांदेड ते खानापूर पर्यंतच्या सात गावांचा समावेश आहे. यापैकी नांदेड, किरकटवाडी, खडकवासला, खानापूर ही चार गावे रुग्ण संख्या जास्त असल्याने पूर्णपणे प्रतिबंधित क्षेत्र म्हणून जाहीर करण्यात आलेली आहेत.

शिवछत्रपतींच्या आणखी एका सरदाराचे स्मारक सापडले; मरहट्टी इतिहास संशोधक मंडळाची कामगिरी

जिल्हाधिकाऱ्यांच्या आदेशाची अंमलबजावणी करण्यासाठी पुणे ग्रामीणचे पोलिस अधीक्षक संदीप पाटील व उपअधीक्षिका सई भोरे-पाटील यांच्या मार्गदर्शनाखाली हवेली पोलिस स्टेशनचे पोलीस निरीक्षक अशोक शेळके यांनी कडक पोलिस बंदोबस्त तैनात केला आहे. हवेली पोलिस स्टेशनच्या कर्मचाऱ्यांसह होमगार्डचे 23 जवान व पोलीस मुख्यालयाकडून आलेले अतिरिक्त 20 जवान असा मोठा फौजफाटा तैनात करण्यात आलेला आहे. प्रत्येक वाहनाची तपासणी केली जात आहे व विनाकारण फिरताना आढळल्यास, सार्वजनिक ठिकाणी फिरताना मास्क लावलेला नसल्यास नागरिकांवर गुन्हे दाखल करण्यात येत आहेत.