Loksabha Elections : शिरूरच्या उमेदवारीसाठी अजूनही शर्यतीत : आढळराव, ‘म्हाडा’च्या अध्यक्षपदाचा स्वीकार

पुणे : ‘‘शिरूर लोकसभा मतदारसंघाच्या महायुतीच्या उमेदवारीबाबतचा निर्णय हे महायुतीतील तीनही प्रमुख घटक पक्षांचे नेते चर्चा करून घेतील. गेल्या लोकसभा निवडणुकीत ज्या पक्षाचा उमेदवार दुसऱ्या क्रमांकावर होता, त्याच पक्षाच्या व्यक्तीला महायुतीची उमेदवारी मिळेल. आज मी ‘म्हाडा’चे अध्यक्षपद स्वीकारले आहे. आपल्या सर्वांना वाटते की माझा लोकसभा निवडणुकीतील उमेदवारीची पत्ता कट झाला की काय? पण प्रत्यक्षात तसे काही नाही,’’ असे शिरूर लोकसभा मतदारसंघाचे माजी खासदार आणि ‘म्हाडा’चे नवनियुक्त अध्यक्ष शिवाजीराव आढळराव पाटील यांनी गुरुवारी (ता.२२) येथे पत्रकार परिषदेत बोलताना सांगितले.

राज्य सरकारने नुकतीच आढळराव पाटील यांची ‘म्हाडा’च्या पुणे विभागाच्या अध्यक्षपदी नियुक्ती केली आहे. या नियुक्तीनंतर त्यांनी आज ‘म्हाडा’च्या अध्यक्षांचा पदभार स्वीकारला. त्यानंतर आयोजित पत्रकार परिषदेत ते बोलत होते. या वेळी विधान परिषदेच्या उपसभापती डॉ. नीलम गोऱ्हे, शिवसेनेचे जिल्हाप्रमुख रमेश कोंडे आदी उपस्थित होते.

आढळराव पाटील म्हणाले, ‘‘येत्या लोकसभा निवडणुकीसाठी शिरूर लोकसभा मतदारसंघासाठीचा महायुतीचा उमेदवार मुख्यमंत्री एकनाथ शिंदे आणि उपमुख्यमंत्री अजित पवार हे चर्चा करून निश्‍चित करणार आहेत. मी कधीही खासदारकीच्या उमेदवारीसाठी काम करत नाही. मला शिरूर लोकसभेची महायुतीची उमेदवारी मिळाली नाही तरी चालेल, पण मुख्यमंत्री शिंदे यांच्या सूचनेनुसार लोकसभा निवडणुकीचे काम करणार आहे.’’