केंद्रीय विद्यालयातील प्रवेशासाठी एक एप्रिलपासून ऑनलाइन नोंदणी होणार सुरू

पुणे : कोरोनाच्या वाढत्या संसर्गाच्या पार्श्वभूमीवर केंद्रीय विद्यालयामधील इयत्ता पहिलीच्या प्रवेशासाठी ऑनलाइन नोंदणी करण्याची सुविधा उपलब्ध करून दिली जाणार आहे. देशभरातील केंद्रीय विद्यालयामध्ये 2021-22 या शैक्षणिक वर्षाकरिता इयत्ता पहिलीच्या प्रवेशासाठी एक एप्रिलपासून ही ऑनलाइन नोंदणी सुरू होणार आहे. तर इयत्ता दुसरी आणि त्यापुढील इयत्तांसाठी नोंदणी प्रक्रिया आठ एप्रिलपासून ऑफलाइन पद्धतीने सुरू होईल. 
इयत्ता पहिलीसाठी ऑनलाइन नोंदणी एक एप्रिल 2021 रोजी सकाळी 10 वाजता सुरू होईल. ही नोंदणी प्रक्रिया 19 एप्रिल रोजी सायंकाळी सात वाजेपर्यंत सुरू राहणार आहे. शैक्षणिक वर्ष 2021-22 साठी इयत्ता पहिलीच्या केंद्रीय विद्यालयांमध्ये ऑनलाइन प्रवेशासाठी अधिकृत ॲन्ड्रॉईड मोबाईल ॲपद्वारे देखील सुविधा उपलब्ध करून देण्यात आली आहे. याबाबत सविस्तर माहिती केंद्रीय विद्यालयाच्या अधिकृत संकेतस्थळावर उपलब्ध आहे. 

हेही वाचा - कात्रज स्माशानभूमीत होतेय मृतांच्या नातेवाईकांची वारेमाप लूट!
तर इयत्ता दुसरी आणि त्यापुढील इयत्तांसाठी प्रवेश घेण्यासाठी 8 एप्रिल ते 15 एप्रिलपर्यंत ऑफलाइन पद्धतीने संबंधित केंद्रीय विद्यालयातील उपलब्ध जागांच्या आधारे नोंदणी करता येणार आहे. सर्व इयत्तांसाठी वयाची गणना 31 मार्च 2021 रोजीपर्यंत ग्राह्य धरली जाईल. जागांचे आरक्षण केव्हीएस प्रवेश मार्गदर्शक सूचनांनुसार असणार आहे. याबाबत सविस्तर माहिती संबंधित संकेतस्थळावर पाहता येणार आहे. 

प्रवेशाचा तपशील:
- प्रवेशाची सविस्तर माहिती संकेतस्थळ : https://kvsonlineadmission.kvs.gov.in 
- इयत्ता पहिली : ऑनलाइन नोंदणीचा कालावधी - 1 ते 19 एप्रिल 
- इयत्ता दुसरी आणि त्यापुढील इयत्ता : ऑफलाइन नोंदणीचा कालावधी : 8 ते 15 एप्रिल