पेट्रोल भेसळ करणाऱ्या आरोपीस 40 वर्षांनी अटक; सध्या 'तो' सरपंच होता ! 

पुणे : पेट्रोलमध्ये भेसळ केल्याप्रकरणी गुन्हा दाखल असलेला कामगार आरोपी तब्बल 40 वर्ष पोलिसांना गुंगारा देत होता. या प्रदीर्घ कालावधीत आरोपीने एका गावच्या सरपंचपदापर्यंत मजल मारली. 40 वर्षाने का होईना, स्वारगेट पोलिसांना त्याचा सुगावा लागला. अखेर पोलिसांनी त्यास अटक केले. न्यायालयाने त्याची रवानगी न्यायालयीन कोठडीत केली.

ताज्या बातम्यांसाठी डाऊनलोड करा ई-सकाळचे ऍप

विजय मुगूटराव गरूड (वय 61, रा. भाबवडे, न्हावी,भोर) असे अटक केलेल्या आरोपीचे नाव आहे. कात्रज परिसरातील लडकत पेट्रोल पंपावर 1980 मध्ये आरोपी विजय गरूड हा कामगार म्हणून काम करत होता. संबंधीत पेट्रोल पंपालर अन्न व औषध प्रशासनाने केलेल्या कारवाईत पेट्रोलमध्ये भेसळ असल्याचे निदर्शनास आले होते. त्यानुसार, पेट्रोलपंप मालक बाळासाहेब लडकत, गरूड व अन्य एका कामगाराविरुद्ध जीवनावश्‍यक वस्तू कायद्यान्वये गुन्हा दाखल झाला होता. दरम्यान, लडकत यांचा मृत्यू झाला. 

कोण आहेत न्या. मुरलीधर? ज्यांची रातोरात बदली झाली?

या प्रकरणाचा तपास करीत असताना गरुड हा भोर तालुक्‍यातील भाबवडे गावचा सरपंच असल्याची माहिती पोलिसांना मिळाली. त्यानुसार, स्वारगेट पोलिस ठाण्याचे पोलीस निरीक्षक (गुन्हे) शब्बीर सय्यद यांच्या पथकाने गरुडला ताब्यात घेतले. त्याच्याकडे वयाबाबत विचारणा केली. तेव्हा, त्याने आपले वय 50 सांगितले. पोलिसांना संशय आल्याने त्यांनी त्याच्याकडील ओळखपत्र मागितले. त्यावरुन तो 61 वर्षांचा असल्याचे उघड झाले. तसेच तो 1980 यावर्षी पेट्रोल पंपावर कामाला असल्याची खात्री पटल्यानंतर पोलिसांनी त्यास अटक केली. न्यायालयाने त्याच्याविरुद्ध चार ते पाच वेळा अजामीनपात्र वॉरंट काढले होते. मात्र तो न्यायालयात हजर राहीला नाही. तसेच त्याने जाणीवपुर्वक चुकीचा पत्ता दिल्याने पोलिसांनाही त्याच्यापर्यंत पोचणे अवघड जात होते. अखेर राजगड पोलिसांच्या मदतीने पोलिसांनी त्यास बेड्या ठोकल्या.