Pune : नव्या व्हेरिएंटसाठी सज्ज; जम्बो सुरूच ठेवणार - अजित पवार

पुणे : गेल्या काही दिवसांपासून शहरातील कोरोना (Corona) रूग्णांची संख्या कमी होत आहे, ही अतिशय दिलासादायक बाब आहे. मात्र, दक्षिण अफ्रिकेत (South Africa) आढळलेल्या कोरोनाच्या नव्या ओमिक्रोम (Omicron) व्हेरिएंटमुळे चिंता वाढली आहे. त्या पार्श्वभूमीवर पुणे शहर आणि पिंपरी-चिंडवडमधील जंम्बो कोविड (Jumbo Covid Center) रूग्णालय सुरूच ठेण्यात येणार आहे, त्याबाबतचा निर्णय 31 डिसेंबर रोजी घेतला जाईल, अशी माहिती राज्याचे उपमुख्यमंत्री आणि पुण्याचे पालकमंत्री अजित पवार (Ajit Pawar) यांनी शनिवारी दिली. पुण्यात आयोजित कोरोना आढावा बैठकीत ते बोलत होते.

दरम्यान, शहरातील रूग्णसंख्या कमी होत असल्याने खूल्या जागेतील गायन आणि इतर कार्यक्रमांना देण्यात आलेली 50 टक्के उपस्थितीची मर्यादा शिथिल करण्यात आली आहे. तसेच डिसेंबर महिन्यात आयोजित करण्यात येणाऱ्या भिमथडी जत्रेलादेखील परवानगी देण्यात आली आहे. मात्र, या सर्व ठिकाणी कोरोना नियमांचे तंतोतंत पालन कारावे लागणार आहे, असे पवार यांनी नमूद केले.

1 डिसेंबरपासून सिनेमागृह, नाट्यगृह पूर्ण क्षमतेने सुरु

पुणे आणि जिल्हातील कोरोनाची परिस्थिती सध्या नियंत्रणात आहे, त्यामुळे 1 डिसेंबरपासून सिनेमागृह, नाट्यगृह पूर्ण क्षमतेने सुरु करणार असल्याचे पवार यांनी यावेळी सांगितले. तसेच सवाई गंधर्व भीमसेन महोत्सवला नियमांचे पालन करून परवानगी असणार आहे. डिसेंबरच्या चौथ्या आठवड्यात भिमथडी जत्रेला परवानगी देण्यात आली असल्याचे पवार यांनी यावेळी सांगितले.

निर्बंधांबाबत काय म्हणाले अजित पवार

विमानतळावर विदेशातून येणाऱ्या प्रवाशांच्या बाबतीत केंद्र सरकार जी नियमावली तयार करेल तिचे पालन केले जाईल, असे सांगताना अजित पवार म्हणाले की, पुण्यात कोरोनाची परिस्थिती तुलनेने बरी आहे ,पण जागतिक पातळीवर नव्या प्रकारचा व्हायरसचा फैलाव होत आहे. त्यामुळे चिंतेचे वातावरण आहे, याबाबत वेगवेगळ्या प्रकारची मते असून, राज्यातल्या सगळ्या वरिष्ठ अधिकाऱ्यांची मुख्यमंत्री उद्या व्हिडीओ कॉन्फरन्सद्वारे बैठक घेणार आहेत. दरम्यान, राज्यात काही निर्बंध पुन्हा आणावी लागतील असा सूचक इशारदेखील त्यांनी यावेळी दिला.