प्रेक्षकांची चित्रपटगृहांकडे पाठ

पुणे - देशातील विविध राज्यांमध्ये कोरोनाचा (Corona) नवा व्हेरिएंट असलेल्या ‘ओमिक्रॉन’मुळे (Omicron) बाधितांची संख्या वाढत आहे. त्यामुळे संसर्गाचा धोका (Infection Danger) टाळण्यासाठी देशातील ६० टक्क्यांहून अधिक नागरिकांनी पुढील ६० दिवसांत चित्रपटगृहे (Theater) किंवा मल्टिप्लेक्सला (Multiflex) भेट देणार नसल्याचे मत व्यक्त केले आहे. ही बाब नुकतीच एका सर्वेक्षणातून समोर आली आहे.

कोरोनाचा धोका अद्याप कमी झाला नसून ओमिक्रॉनच्या रुग्णांची संख्याही वाढत आहे. हा संसर्ग रोखण्यासाठी शासनाच्या वतीने विविध प्रयत्न करण्यात येत आहेत. तसेच नागरिकांकडूनही खबरदारी घेण्यात येत आहे. याचाच आढावा घेण्यासाठी ‘लोकल सर्कल्स’च्या वतीने देशातील ३१४ जिल्ह्यांतील नागरिकांचे मत जाणून घेण्यात आले.

त्यात १६ हजार नागरिकांनी सहभाग घेतला. त्यातील ६२ टक्के पुरुष तर ३८ टक्के महिला आहेत. या सर्वेक्षणाच्या अहवालानुसार गेल्या वर्षीपासून बंद असलेले चित्रपटगृह व नाट्यगृहांना उघडण्याची परवानगी मिळाल्यानंतर नागरिकांचा त्यास चांगला प्रतिसाद मिळत आहे. परंतु संसर्गाची भीती असल्याने आता नागरिकांकडून खबरदारी घेण्यात येत आहे. तर केवळ १४ टक्के नागरिकांनी चित्रपटगृह किंवा मल्टिप्लेक्समध्ये जाण्याचे मत व्यक्त केले आहे.

अहवालातील महत्त्वाच्या बाबी

• जुलै २०२१ च्या तुलनेत चित्रपटगृहात जाऊन चित्रपट पाहणाऱ्यांच्या संख्येत वाढ

• ओमिक्रॉनचा प्रसार वेगाने होत असल्याने मल्टिप्लेक्समध्ये जाणे धोक्याचे

• एकूण ६२ टक्के नागरिकांची मनोरंजनाच्या साधनांकडे पाठ

• चित्रपटगृहांमध्ये मास्क वापर टाळण्याची शक्यता अधिक