अन् चक्क यमराज रस्त्यावर उतरला...

पुणे : "सुरक्षित अंतर ठेवा, नाहीतर माझ्यासोबत चला", "कोरोना माझा मित्र आहे, त्याच्यापासून दूर रहा" या कुठल्याही मोर्चातील घोषणा नाहीत, तर आपल्या वाहनासह (रेडा) रस्त्यावर उतरलेल्या यमराजाने पुणेकरांना दिलेला हा सल्ला आहे ! निमित्त होते, नागरीकांमध्ये कोरोनाविषयी जनजागृतीसाठी स्वारगेट पोलिसांनी काढलेल्या अनोख्या फेरीचे.

काय सांगता, पुणे झेडपीला डाॅक्टर आणि नर्स मिळेना...

शहरात कोरोनाचा संसर्ग दिवसेंदिवस वाढत आहे.त्यामुळे प्रशासन लॉकडाऊन करुन त्यावर नियंत्रण मिळविण्याचा प्रयत्न करत आहे. असे असतानाही काही नागरीक लॉकडाऊनच्या नियमांनाच थेट हरताळ फासत असल्याची सद्यस्थिती आहे. या पार्श्वभुमीवर स्वारगेट पोलिसांनी अनोखी शक्कल लढविली.

स्वारगेट विभागाचे सहाय्यक पोलिस आयुक्त सर्जेराव बाबर, स्वारगेट पोलिस ठाण्याचे वरिष्ठ पोलिस निरीक्षक ब्रम्हानंद नायकवडी, पोलिस निरीक्षक (गुन्हे) शब्बीर सय्यद, सेवाभावी संस्था पदाधिकारी रविन्द्र हुले, भरत सुराणा, अल्ताफ सौदागर यांनी स्वारगेट पोलिस ठाण्याच्या हद्दीत नागरीकांमध्ये कोरोनाविषयक जागृती करण्यासाठी कलाकाराच्या मदतीने प्रतीकात्मक स्वरुपात यमराजाद्वारे महर्षीनगर, मुकुंदनगर, लक्ष्मीनारायण चित्रपटगृह परिसर, जेधे चौक या परीसरात पायी फेरी मारली. त्यावेळी यमराजाच्या वेशभुषेतील कलाकाराने विविध प्रकारच्या घोषणा देत नागरीकांना घराबाहेर न पडण्याचे, मास्क, सैनीटायझर वापरण्याचे आणि सामाजिक अंतर ठेवण्याचे आवाहन केले.

पुण्याच्या इतर बातम्या वाचण्यासाठी येथे क्लिक करा