Baramati News : बारामती कृषी विज्ञान केंद्राला सर्वोत्कृष्ट नोडल प्रशिक्षण संस्था म्हणून सन्मानित

माळेगाव - अ‍ॅग्रीकल्चर डेव्हलपमेंट ट्रस्ट बारामती संचलित कृषि विज्ञान केंद्राला सर्वोत्कृष्ट नोडल प्रशिक्षण संस्था म्हणून सन्मानित केल्याची माहिती पुढे आली आहे. राष्ट्रीय कृषी विस्तार प्रबंध संस्थान (मॅनेज) हैदराबाद या संस्थेने १५ ऑगस्ट रोजी बारामती कृषी विज्ञान केंद्राला सन्मानित केले.

मॅनेज हैदराबाद या संस्थेचे महासंचालक डॉ. पी. चंद्रशेकरा व मुख्य समन्वयक डॉ.शहाजी फंड यांच्या हस्ते बारामती केंद्राचे प्रतिनिधी व नोडल अधिकारी डॉ. रतन जाधव यांना प्रमाणपत्र देऊन सन्मानित करण्यात आले. दरम्यान, कृषी विज्ञान केंद्र बारामती येथे ४५ दिवशीय ॲग्री-क्लिनिक्स आणि ॲग्री-बिझनेस हे उद्योजकता विकास प्रशिक्षण दिले जाते.

अर्थात राष्ट्रीय कृषी विस्तार प्रबंध संस्थान (मॅनेज) हैदराबाद या संस्थेच्या मार्गदर्शनाखाली सन २००६ पासून वरील उपक्रम राबविण्यात येत आहे. आतापर्यंत केंद्रामध्ये ॲग्री-क्लिनिक्स आणि ॲग्री-बिझनेस या प्रशिक्षणाच्या माध्यमातून ४१ बॅचेस पूर्ण झाल्या आहेत. त्यामध्ये १२७४ प्रशिक्षणार्थींना प्रशिक्षण देण्यात आल्याची नोंद आहे.

त्यापैकी ६२४ पेक्षा जास्त प्रशिक्षणार्थींनी स्वतःचे कृषीपूरक व्यवसाय सुरु केले आहेत. तसेच प्रशिक्षण घेतलेल्या ८१ विद्यार्थ्यांच्या कृषीपूरक व्यवसाय सुरु केल्याच्या यशोगाथा डिसेंबर २०२२ मध्ये मॅनेज हैदराबाद संस्था प्रशासनाकडे दिल्या होत्या. हे यशस्वी प्रयत्न विचारात घेत हैदराबाद संस्थेने सन २०२२ साठी सर्वोत्कृष्ट नोडल प्रशिक्षण संस्था म्हणून बारामती कृषी विज्ञान केंद्राची निवड केली.

सदर प्रशिक्षणाचे समन्वयक म्हणून गणेश शिंदे व संतोष गोडसे यांनी काम पाहिल्याचे सांगण्यात आले. अ‍ॅग्रीकल्चर डेव्हलपमेंट ट्रस्टचे प्रमुख राजेंद्र पवार, विश्वस्त सौ.सुनंदा पवार, मुख्य कार्यकारी अधिकारी प्रा. निलेश नलावडे, डॉ. धीरज शिंदे यांनी कृषी विज्ञान केंद्रातील संबंधित अधिकाऱ्यांचे अभिनंदन केले.